Trasladan a prisión ao xefe da Operación Carioca

O considerado xefe da ‘Operación Carioca’, José Manuel García Adán, foi enviado finalmente á prisión lucense de Bonxe tras ser condenado a penas que suman 20 anos de prisión polos delitos de malos tratos habituais, lesións, agresións sexuais continuadas e ameazas á súa exmuller.

Segundo confirmaron fontes da Garda Civil, Adán foi conducido ao centro penal tras coñecerse a condena e pedir o seu avogado que, á espera de que se resolva o recurso que vai presentar contra o fallo, en lugar de ser enviado a prisión provisional se acepte a medida de liberdade con fianza.

Tras a celebración do xuízo na Sección Segunda da Audiencia Provincial de Lugo hai case un mes por supostos malos tratos e agresións sexuais á súa exmuller desde 2003 a 2008, período en que durou a súa convivencia, a Fiscalía ampliara de 27 a 31 anos a petición de pena de cárcere para o considerado xefe da ‘Operación Carioca’.

En concreto, a Fiscalía aumentara de 27 a 31 anos a petición de condena; tres anos por violencia habitual, dúas por malos tratos, dous por un delito continuado de ameazas, nove por dúas detencións ilegais no club Queens e quince por agresión sexual.

Pola súa banda, a acusación particular incorporou outro delito por malos tratos psicolóxicos, mentres que a defensa mantivo a petición de libre absolución do seu patrocinado.