O volume de traballo dos servizos sociais de Vilagarcía incrementouse cun 8,6% máis de expedientes tramitados

Os efectos da prolongada crise nas economías domésticas segue tendo un claro reflexo na actividade dos servizos Sociais municipais aos que cada vez recorren máis veciños. O efecto máis inmediato disto é o incremento do volume de traballo que esta Área rexistrou en 2013, ano no que o número de expedientes tramitados elevouse un 8,6% respecto ao exercizo anterior. A iso hai que sumar o o número de informes emitidos polos Servizos Sociais en 2013, que se elevou en maior proporción, cun 14,7% máis que en 2012.

Estes dous datos teñen maior significado si se ten en conta que a tendencia ao incremento da demanda de acción social é unha constante dende hai varios anos. Por iso, para afrontar esta situación a Área de Sevizos Sociais reforzou o persoal en 2013 e implantou novas medidas de organización do traballo para poder atender a toda a demanda coa maior axilidade posible.

A memoria de actividade dos servizos Sociais do Concello no ano 2013 desvela que o número total de expedientes tramitados polas súas unidades de traballo alcanzou os 5.128, o que supón 406 máis que o ano anterior. Á tramitación dos diferentes expedientes hai que engadir a realización de informes para incluír nestes expedientes ou para aportar a solicitudes ou trámites ante outras administracións e que precisan da preceptiva valoración dos servizos sociais municipais. Neste apartado, a Área emitiu o ano pasado 209 informes máis que en 2012, o que supuxo un total de 1.628 fronte aos 1.417 realizados un ano antes.

Certificacións do IRPF, revisión de pensións e colaboración con entidades

Por temáticas, o asunto que propiciou un maior número de expedientes foi o de peticións de certificacións de IRPF (1.195), seguido das revisións anuais de pensións non contributivas (495). No relativo ás pensións tamén se dou trámite a 30 solicitudes de pensión non contributiva de invalidez, 22 de xubilación e 12 de complemento de aluguer.

O terceiro bloque temático compuxérono os expedientes relativos a accións de colaboración con outras entidades sociais coas que a Área de Servizos Sociais ten subscrito un protocolo de actuación para atender as necesidades sociais básicas e de urxente necesidade dos usuarios. Neste punto tramitáronse un total de 283 expedientes dos que 178 corresponden a temas relacionados co Plan de Inclusión das Oficinas de I+B da Xunta, 41 os servizos concertados entre o Concello e Cruz Vermella, 34 coa Fundación Amigos de Galicia, 23 con de Cáritas Interparroquial e 5 co Club de Leones.

A tramitación das RISGA tamén orixinaron un bo número de expedientes, 238 por novas solicitudes e 97 por revisións anuais doutras tantas xa concedidas. Tamén as Axudas de Emerxencia Social supuxeron un importante volume de traballo nos servizos Sociais ao xerar 169 expedientes de axudas da administración autonómica e 189 das axudas de pago único que realiza a administración municipal. As prestacións por fillos menores de tres anos a cargo orixinaron 86 expedientes, as axudas alimenticias e de hixiene de carácter periódico supuxeron 184 aos que hai que sumar os 93 correspondentes a renovacións deste mesmo tipo de axudas sociais. Por último, os Servizos Sociais Municipais tamén deron trámite en 2013 a 57 expedientes de axudas infantís de carácter periódico para familias con fillos de ata 18 meses. O número de expedientes relativos ao servizo de Axuda no Fogar elevouse a 20.

Por recoñecementos de minusvalidez tramitáronse 303 expedientes, por valoración de mobilidade 6, por valoración de dependencia 80 e por recoñecemento ó dereito efectivo de prestación económica de solicitudes persoas dependentes xa falecidas, 2. Ademais realizouse un informe de caso de respiro familiar para coidadores de persoas con dependencia, tramitáronse 51 expedientes de declaración anual de libranza por coidados ó entorno -tamén relacionados coa dependencia-, 2 expedientes de recoñecemento da condición de usuario do servizo galego de Apoio á Mobilidade Persoal e 14 por renovacións das prestacións da Lei de Inserción Social de Minusválidos.

Por outro lado, as matrículas da Escola Infantil Municipal deron pe a 347 expedientes, dos cales 102 corresponderon a renovacións e 17 ás altas na Escola Infantil de Verán. En materia social relacionada coa educación, tamén se tramitaron en 2013 un total de 43 expedientes para as Axudas Municipais para a compra de material escolar para nenos de 0 a 3 anos, e outros 49 polas solicitudes de praza no programa municipal do Conciliatardes.

Os Servizos Sociais do Concello tamén se encargaron de tramitar e informar outros moitos asuntos, como as bonificacións de impostos municipais (122), as solicitudes e renovacións do Bono Bus Municipal (6 e 98 respectivamente), informes de arraigo ou inserción social (17).

Servizos, programa e obradoiros

Outro campo que xera a tramitación de expedientes refírese aos programas e servizos que presta directamente o Concello a través da súa Área de servizos Sociais o en colaboración con outras administracións. Neste apartado pódese mencionar os 18 expedientes do Obradoiro de Atención a Dependentes, os 16 do Obradoiro de Técnicas Educativas para Familias, 2 do Programa Reconduce, 3 do de Xantar na Casa e 6 máis do de Xuntos polo Nadal.

Reforzo de persoal e protocolo de atención

Para afrontar esta crecente demanda de Servizos Sociais e o incremento do volume de traballo que esta situación xera, a Concellería que dirixe Elena Suárez, reforzou en 2013 o persoal da Área e implantou novas medidas de organización do traballo para poder atender a toda a demanda coa maior axilidade posible. Ademais das 8 unidades de traballo xa existentes (Unidade Administrativa, tres Unidades de Traballo Social, dúas Unidades de Educación Social, Unidade de Programas e Unidade de Coordinación) e nas que traballan de forma estable 9 persoas 5 traballadores sociais, 1 Traballadora Socia, 2 auxiliares administrativas, 1 Educadora Social e 1 coordinadora de departamento; a Concellería puxo en marcha en setembro de 2013 unha Unidade de Primeira Atención (UPA) para tratar de aliviar a carga de traballo dos demais departamentos.

A creación da UPA foi posible grazas ás contratacións temporais realizadas a través da Bolsa de Práctica Laboral da Deputación e conta con dúas bolseiras Traballadoras Sociais. A UPA é a “porta” dos Servizos Sociais xa que é nesta Unidade onde se recibe aos usuarios que acoden por vez primeira ou que reactivan un expediente inactivo dende hai 2 anos.

A creación desta nova Unidade, fixo preciso elaborar en poñer en práctica un protocolo de primeira atención e recepción de chamadas. Segundo este documento, na UPA, os usuarios reciben información sobre axudas de emerxencia e realízase unha primeira primeira valoración en función dos requisitos que cumpren para solicitar determinadas axudas. Aquí tamén se atende os casos que se presentan como urxentes, que despois da primeira atención, son derivados á Unidade de Traballado Social correspondente fixando cita coa prontitude que esixa a demanda.

Ao actuar como filtro e orientar adecuadamente cada caso ao departamento ou recurso preciso, a UPA libera de carga de traballo ao resto dos Servizos Sociais, o que se traduce nunha maior axilidade nos tempos de tramitación. De feito, a UPA atendeu entre setembro e decembro de 2013 a un total de 577 unidades familiares, segundo se desprende da memoria de actividade dese ano.