Besteiro: “a Deputación de Lugo foi a que advertiu posibles irregularidades no seu servizo de obras”

O presidente da Deputación de Lugo, José Ramón Gómez Besteiro, recordou este xoves que foi a propia institución que el dirixe a que puxo en coñecemento de “instancias xudiciais” a existencia de posibles irregularidades nas obras da piscina de Monterroso.

Preguntado en rolda de prensa no Parlamento pola información que publica o diario ‘El Progreso’ relativa á imputación do xefe de proxectos da Deputación polo desvío de diñeiro desa obra, Besteiro fixo fincapé en que a acción xudicial partiu do ámbito provincial.

A maiores, o tamén líder do PSdeG aludiu á publicación, “por parte de La Voz de Galicia’, de que a Xunta pediu o Goberno central que exclúa a Sogama da reforma enerxética no que atinxe á supresión das primas para as enerxías renovables.

Tras preguntarse como é posible que o Executivo autonómico non explorara “antes” esta vía en lugar de optar por subir o canon de xestión de residuos un 34 por cento, interpretou esta información como “un aviso a navegantes” de que o ano próximo haberá un novo “tasazo”.

E é que, como recalcou, o modelo actual da planta de Cerceda (A Coruña) “non é viable”. “Nin economicamente, nin ambientalmente”, resaltou o xefe de filas dos socialistas galegos.