Oroso convoca o concurso de receitas “En galego sabe mellor”

O Concello de Oroso convoca o concurso de receitas de entroido “En galego sabe mellor”, unha iniciativa que chega este ano á súa quinta edición e coa que busca combinar a recuperación de receitas tradicionais do Entroido co fomento do uso da lingua galega. Por iso, o xurado non só valorará a presentación e a creatividade do prato, senón tamén o uso que se fai do idioma galego na receita.

O concurso está aberto a todos os veciños e veciñas de Oroso maiores de 16 anos, que poden presentar ata un máximo de dúas receitas por participante. O gañador levará unha cea para dúas persoas no restaurante Cortés (Sigüeiro), mentres que o finalista acadará un libro de cociña. Ambas receitas serán publicadas posteriormente na páxina web municipal (www.concellooroso.com) para que así tamén as poidan elaborar todos os internautas que o desexen.

As receitas deberán entregarse mecanografadas no centro cultural Fernando Casas e Novoa antes do vindeiro 24 de febreiro. Posteriormente, deberase presentar o prato cociñado da casa o 25 de febreiro no centro cultural de Sigüeiro, ben en horario de 9:00 a 14:00 horas ou ben de 17:00 a 18:00 horas.

Os premios entregaranse o 1 de marzo, ás 19:30 horas, no transcurso dun acto aberto ao público no centro cultural de Sigüeiro. As bases do concurso poden recollerse no centro cultural ou descargarse da páxina web www.concellooroso.com.