A Confraría de Vilanova de Arousa recibirá 116.000 euros para mellora da produtividade dos bancos marisqueiros

Cores Tourís na visita á confraría de Vilanova de Arousa

O delegado territorial da Xunta en Pontevedra, José Manuel Cores Tourís, visitou esta mañá a sede da confraría de A Pastoriza de Vilanova de Arousa, acompañado polo alcalde da localidade, Gonzalo Durán, e o patrona maior deste pósito, Evangelina Lago.

Tamén estivo presente na visita a coordinadora da área de Mar en Pontevedra, Sonia Lorenzo.

Durante a encontro, o responsable da Delegación Territorial aproveitou para anunciar que o pósito de Vilanova de Arousa recibirá case 116.000 euros para a mellora da produtividade dos bancos marisqueiros e para a xestión e vixiancia.

Deste xeito, segundo recordou o delegado territorial, a Consellería do Medio Rural e do Mar destinará 545.000 euros na provincia de Pontevedra á mellora da produtividade dos bancos marisqueiros con perda de produción, “o que supón un 80% do total a nivel autonómico”. Esta liña de axudas destínase a proxectos colectivos de acondicionamento mariño e rexeneración, co fin de contribuír de forma sustentable a mellorar a xestión e conservación dos recursos mariños vivos.

Desta cantidade, 340.000 euros destinanse a mellora da produtividade dos bancos marisqueiros nas diferentes confrarías da comarca de O Salnés. No caso do pósito vilanovés, en concreto, a confraría da Pastoriza obtivo unha axuda de 20.000 para a rexeneración de o Esteiro de Vilamaior e o banco de Negrenla.

Convenios de xestión e conservación

Por outro lado, o delegado territorial da Xunta en Pontevedra, José Manuel Cores Tourís, tamén quixo facer referencia durante a súa visita a Vilanova de Arousa da concesión dos convenios de colaboración coas diversas confrarías da provincia para a xestión e conservación de zonas de produción e vixilancia.

Neste senso, destacou que a cantidade destinada dende a Consellería de Medio Rural e do Mar a este fin roldará en Galicia os 3,2 millóns de euros, correspondendo á provincia de Pontevedra 1,5 millóns. “A comarca de O Salnés recibirá algo máis de 709.000 euros, é dicir, o 54% do total a nivel provincial. Destas subvencións, A Pastoriza percibirá algo máis de 95.600 euros”, concluíu Cores Tourís destacando que esta cantidade será destinada a asistencia técnica para o posto de biólogo e a contratación de cinco vixiantes durante 12 meses.

“Os datos aportados demostran a implicación da Consellería coas confrarías da provincia de Pontevedra e, en concreto, coas do Salnés, tendo en conta, ademais, que estamos a falar dos pósitos que son, na maioría dos concellos, os principais motores económicos das vilas”, finalizou o responsable territorial.