35 nenos participan na primeira quenda do campamento urbano da Laracha

O Concello da Laracha continúa desenvolvendo o programa de actividades de verán que inclúe propostas especialmente dirixidas aos nenos como medio de ofrecerlles a eles alternativas para o aproveitamento do seu tempo libre e, aos seus pais, unha axuda para a conciliación da vida persoal, familiar e laboral durante as vacacións do verán.

Este luns comezaron a segunda quenda dos tradicionais campamentos de verán da praia de Caión e tamén o primeiro turno dos campamentos urbanos que o Concello da Laracha organiza por segundo ano consecutivo.

Nesta primeira quenda dos campamentos urbanos participan 35 nenos de idades comprendidas entre os tres e os sete anos. Desde onte luns e ata o venres realizarán moi diversas actividades educativas, deportivas e ludo-recreativas nas instalacións do pavillón do IES Agra de Leborís durante toda a mañá, desde as 9.00 ata as 14.00 horas.

Na xornada de mañá mércores realizarán unha saída ao parque eólico experimental de Sotavento, no concello lugués de Xermade. Alí aprenderán interesantes cuestións relacionadas coas enerxías renovables e serán concienciados sobre a importancia do aforro enerxético, da reciclaxe e do respecto ao medio ambiente en xeral.

O prazo de inscrición na segunda quenda dos campamentos urbanos, que terá lugar do 5 ao 9 de agosto, continúa aberto. As persoas interesadas poden reservar a súa praza de xeito gratuíto no Concello da Laracha. O grupo de idade é o mesmo, é dicir, dos tres aos sete anos.