O centro de información á muller de Ferrol atendeu 300 consultas no primeiro trimestre do ano

Os servizos de Atención Psicolóxica e a Asesoría Xurídica do Centro de Información á Muller (CIM) do Concello de Ferrol atenderon un total de 300 consultas entre os meses de xaneiro, febreiro e marzo de 2013; e abriron 89 novos expedientes. Así se recolle na memoria de actividades deste Centro de titularidade municipal que a concelleira de Igualdade, Verónica Casal Míguez, deu a coñecer hoxe tras presentala aos grupos municipais na última comisión informativa da Área de Benestar Social, Igualdade e Xuventude.

A este respecto, no primeiro trimestre de 2013, a Asesoría Psicolóxica deste centro municipal realizou un total de 128 consultas e 38 mulleres solicitaron cita por primeira vez neste servizo -destas, un total de 24 procederon de Ferrol, sendo nesta ocasión maior a  incidencia de mulleres orixinarias do propio concello con respecto a anos precedentes-. O CIM prestou, así mesmo, asistencia psicolóxica a sete mulleres de Narón, ademais de sete mulleres inmigrantes procedentes de Colombia, Ucraína Ecuador, Brasil e Marrocos. A franxa de idade de maior incidencia, foi, novamente, a comprendida entre os 26 e 35 anos (13 mulleres atendidas, o que supón o 34,2%).

No que atinxe aos motivos de consulta no servizo de Atención Psicolóxica, a violencia de xénero segue a ser a de maior incidencia, seguida dos problemas derivados de patoloxía individual -depresión, ansiedade, trastornos da personalidade-. Neste senso, e conxuntamente coa Asesoría Xurídica do CIM, elabóranse informes de usuarias vítimas de violencia de xénero e informes psicolóxicos para presentar no xulgado, de tal xeito que o problema se aborda a través dun enfoque múltiple e coordinado cos diferentes ámbitos profesionais que interveñen ao longo do proceso (traballadoras sociais, Forzas e Corpos de Seguridade do Estado, centro de saúde mental, Casa da Muller, Área de incorporación sociolaboral do Concello de Ferrol, servizo ATENPRO, Casa de Acollida de Ferrol,etc.) Así garántase unha atención de calidade ás mulleres que padecen estas situacións de maltrato.

Patoloxías individuais, como trastornos da personalidade ou de adaptación, problemas de parella (especialmente procesos de crises persoais tras a ruptura da relación e dificultades coa parella), problemas de orientación laboral e ata un caso de violencia sexual foron outros dos motivos de consulta da Asesoría Psicolóxica recibidos polas mulleres que acudiron ao Centro de Información á Muller (CIM) no primeiro trimestre do ano. En canto ao perfil das usuarias, un alto porcentaxe de mulleres que acoden ó CIM atópase en situación de desemprego, divorciadas ou en trámites de separación, con estudos primarios e de hábitat urbano.

Apoio xurídico

Ademais de asesoría psicolóxica o Centro presta tamén atención xurídica. Así, entres os meses de xaneiro e marzo rexistráronse un total de 172 consultas (69 en xaneiro, 59 en febreiro e 44 en marzo) e abríronse 51 novos expedientes. A atención xurídica préstase os luns, mércores e xoves, segundo citas e urxencias.

O perfil das usuarias atendidas neste período correspóndese co dunha muller de entre 29 e 46 anos, con dous fillos, estudos primarios, de hábitat urbano e en situación de desemprego. No ámbito civil destacan as consultas relacionadas con filiación; maternidade e paternidade; separación; divorcio e nulidade matrimonial; procesos de medidas paterno-filiais, dereitos dos fillos, custodia e réxime de visitas. Con relación á área do laboral, as cuestións máis consultadas son a contratación, condicións de traballo, finalización do contrato -despido e extinción do mesmo-.

En canto ás demandas de orientación sobre a tramitación de solicitude de xustiza gratuíta ante o Servizo de Orientación Xurídica do Colexio de Avogados/as de Ferrol, un total de 18 expedientes foron tramitados entre xaneiro e marzo. Ademais, a oficina do CIM ofreceu información a mulleres vítimas de violencia de xénero sobre o Programa ATENPRO, do Ministerio de Igualdade, tramitando un total de cinco dispositivos de seguridade. Finalmente, a asesoría xurídica do Centro de Información á Muller solicitou ao Punto de Coordinación das Ordes de Protección (PCOP) un total de tres acreditacións da condición de vítima deste tipo de violencia, sendo presentadas o mesmo número de solicitudes de inclusión no programa de inserción laboral dirixido a estas mulleres.