A OMIC de Ourense deu apoio a máis de 6.000 ourensáns na defensa como consumidores

A Oficina Municipal de Información ao Consumidor do Concello de Ourense prestou atención durante o ano 2012 a un total de 6.103 persoas, que se achegaron a este servizo municipal gratuíto, dependente da Concellería de Saúde e Consumo, para recibir información e asesoramento acerca dos seus dereitos como consumidores e presentar as súas reclamacións. A OMIC de Ourense conmemora durante este mes a celebración, pasado mañá, venres, 15 de marzo, do Día Mundial do Consumidor, cun ciclo de representacións teatrais para escolares de Infantil e Primaria da obra “Un agasallo para papá”.

A memoria da Oficina Municipal de Información ao Consumidor correspondente ao ano 2012 constata que este servizo municipal atendeu a 910 persoas máis ca o ano anterior, o que supón un aumento porcentual do 15%. Do total de 6.103 persoas atendidas, 615 derivaron nunha reclamación ou denuncia.

O aspecto máis destacado foi o considerable incremento dos estatísticos no sector bancario, que de xeito excepcional ocupa o primeiro lugar na pirámide, debido á comercialización masiva de participacións preferentes e obrigas subordinadas. As cifras por este motivo cuadriplícáronse, elevándose a 816 as consultas e a 24 as reclamacións. Este desequilibrio numérico débese a que (para axilizar os trámites nas solicitudes de arbitraxe) o 90% dos expedientes (47 segundo datos do Rexistro Municipal) deriváronse, en función do perfil do usuario, dende o Rexistro ó IGC (Instituto Galego de Consumo) polo tanto non contabilizan como reclamacións.

Tampouco se contabilizaron como reclamacións (pero sI como consultas) os casos que por razóns de urxencia demandaron unha atención inmediata (debido a necesidades económicas) polo tanto estas persoas, aínda que cumplimentaron a reclamación na OMIC, esta foi presentada directamente na Delegación de Consumo de Ourense.     

O resto dos estatísticos manteñen unha tónica similar a anos anteriores. Como exemplo, a telefonía é o sector máis reclamado (298 reclamacións/739 consultas) polo que se precisa mediar previamente para non sobrecargar de laudos á Xunta Arbitral de Consumo. Así as cousas das 269 mediacións efectuadas en telefonía, resolvéronse 213 de modo favorable. Outros sectores que superaron as 200 consultas foron o aluguer de vivenda (572), a telefonía móbil (497), electricidade (273) e telefonía fixa (242).

Campañas divulgativas

A Oficina Municipal de Información ao Consumidor continuou tamén a desenvolver durante 2012 os seus programas de actividades de educación do consumidor, que chegaron durante o ano 2012 a un total de 7.051 alumnos de 15 centros públicos e 7 concertados da cidade.

A OMIC emprega o teatro como recurso educativo dende 1995, xa que a experiencia acadada nestes anos proba que é o mellor instrumento educativo para promover o cambio de actitudes e explicar os dereitos dos consumidores, unha materia, que de seguro é de utilidade para a vida cotiá. Durante o ano 2012, a obra representada foi “A procura de Alaia”, de Trécola teatro, que contou con 28 funcións ás que asistiron 3.351 alumnos de Primaria de 20 centros de ensino.  Dende 1995 participaron neste programa 42.787 nenos.

Por outra banda, para promover un maior coñecemento da OMIC entre os consumidores e prever os abusos en determinados sectores onde o número de consultas e reclamacións é alto (comunicacións electrónicas, reparacións, banca, vendas, etc.) levouse a cabo unha campaña informativa na que se distribuíron 6.000 folletos divulgativos (sobre aspectos relevantes dos sectores máis conflitivos do consumo). Tamén se lle ofreceu ás asociacións de veciños unha serie de obradoiros co obxecto de resolver dúbidas e de previr aos consumidores dos abusos relacionados coas facturas, contratos, telefonía, vivenda, banca, seguros, viaxes, transportes, etc.

Día Mundial do Consumidor

A OMIC conmemora durante este mes a celebración, pasado mañá, venres, 15 de marzo, do Día Mundial do Consumidor, cun ciclo de representacións teatrais para escolares do último ciclo de Infantil e Primaria da obra “Un agasallo para papá”. O obxectivo da actividade é formar aos cativos como futuros consumidores, e neste caso, amosar o impacto das grandes superficies na desaparición do comercio tradicional. A obra está escrita e dirixida polo grupo Trécola. As funcións represéntanse nos centros de ensino e como complemento algúns centros solicitaron  un obradoiro sobre esta temática.

As  protagonistas  da obra son “Cloe” e “Xulieta”; a primeira  ten unha pequena tenda nun barrio da cidade. Vende obxectos únicos e especiais traídos dende distintas partes do mundo por viaxeiros e aventureiros. Ela tamén fabrica os seus propios obxectos, pero un día un home descoñecido entra na tenda e tráelle uns papeis para asinar. Van demolelo todo porque queren construír un centro comercial.

Xulieta é unha nena moi especial; vai ser o aniversario do seu pai e quere facerlle un agasallo orixinal, pero só atopa cousas aburridas. Sen saber moi ben onde ir, atópase con Cloe que lle amosa o seu comercio e lle axuda a confeccionar o mellor agasallo para seu pai.