Ana Pastor antepón o Partido Popular ao PSOE e os partidos emerxentes

Ana Pastor en Nigrán

A ministra de Fomento e cabeza de lista do PP por Pontevedra, Ana Pastor, insistiu este luns en que de cara ás eleccións xerais do 20 de decembro hai “dúas opcións”: Por un lado o Partido Popular; e, por outro lado, o partido Socialista e os “outros dous partidos emerxentes que levan unha semana pelexándose entre eles a ver quen pode liderar o tripartito de non gañadores”.

Así o manifestou nunha visita ao centro de negocios da Zona Franca de Vigo en Porto do Molle, en Nigrán (Pontevedra), onde manifestou que este “tripartito, parece que -é- de non gañadores” porque “mesmo as enquisas seguen dando, loxicamente, que o Partido Popular é o que gaña as eleccións”.

Ademais, censurou que nas últimas horas estivo a escoitar “bastantes insultos”, a colación do que criticou que “debe ser que algúns pensan que insultando ou faltando á verdade poden ir mellor as cousas”.

En contraposición, remarcou que o Partido Popular está a levar a cabo “unha campaña en positivo”. Así, resumiu estes días de campaña como un período “moi bo, moi positivo” no que se pon en valor o feito polo PP. “porque unha cousa son os experimentos e outra cousa é o que xa se fixo de verdade”, apostilou.

No relativo a o ‘cara a cara’ entre o presidente do Goberno, Mariano Rajoy, e o líder do PSOE, Pedro Sánchez, que se desenvolverá na noite deste luns, a ministra e candidata indicou que o seguirá dende a sede do PP en Pontevedra, como xa fixeran en 2011, cando les “deu muchísima sorte”.

“Van estar aí todos na distancia animándolle a que poida transmitir a todos os españois o que fixo, como estaba España cando chegou o PP, como avanzamos e sobre todo falar do futuro, das propostas do PP e confrontar co principal partido da oposición, que xa sabemos o que nos deixou en España: Un paro galopante e un país en recesión”, concluíu.

OPORTUNIDADES

Xunto á candidata popular Irene Garrido, Pastor gardou este luns un minuto de silencio en recordo dos policías españois falecidos nun atentado terrorista en Kabul, e, a continuación, realizou un percorrido polas instalacións do centro de negocios da Zona Franca de Vigo, onde coñeceu algúns dos proxectos que se están a desenvolver no centro.

Previamente ao acto en Nigrán, Pastor mantivo na sede en Bouzas da Zona Franca unha reunión co equipo directivo, co que analizou “algúns dos grandes proxectos para o futuro de Vigo” que se están a desenvolver. Alí, eloxiou a oportunidade de ver os espazos e proxectos que “van ir cambiando a economía produtiva” da bisbarra.

Neste marco, a ministra, que incidiu en que o que preocupa ao PP é “o emprego” e “darlle á xente máis oportunidades”, avanzou en declaracións aos medios que no ámbito do seu departamento están a traballar “nun proxecto moi ilusionante para Vigo”, os detalles da cal indicou que desvelará este martes.