O Concello de Ames dispón dunha nova biotrituradora para o aproveitamento dos residuos vexetais

Recepción da biotrituradora

Esta mañá o concelleiro de Obras Públicas e Servizos Básicos, Blas García, achegouse ata a nave da brigada municipal de obras para recibir a nova trituradora que adquiriu o Concello de Ames a través dun proceso de contratación para o subministro de maquinaria de parques e xardíns. Coa adquisición desta biotrituradora poderase realizar un mellor aproveitamento dos abundantes residuos vexetais xerados no propio termo municipal. A adquisición desta máquina trituradora, que estaba incluída no lote número catro do proceso de contratación, tivo un custo de 18.144 euros, IVE incluído. 

No pasado mes de agosto o Concello e Ames inicio un expediente de contratación para o subministro de maquinaria de parques e xardíns debido a falta de material que tiña a brigada municipal de obras. Unha vez finalizado o devandito proceso de contratación e adxudicados os catro lotes de maquinaria, esta mañá un representantes da empresa Modesto Vázquez S. L. procedeu a facer entrega da maquinaria correspondente ao lote número catro, que era o último que estaba pendente de entregar.

Anteriormente, xa se fixo entrega dos tres primeiros lotes deste subministro que incluíron un tractor-segadora, unha segadora-cortacespede, seis desbrozadoras, un cortasetos, unha motoserra, unha pértega de poda e unha limpadora a alta presión de auga fría profesional. O custo destes tres lotes ascende a 13.255,52 euros, aos que hai que engadirlle o importe do cuarto lote, composto por unha biotrituradora autónoma, que ten un custo de 18.144 euros, IVE incluído.

Trátase dunha trituradora móbil modelo CIPPO 15, axeitada para o triturado e redución do volume de podas, ramas, troncos de árbores verdes e secos de ata 15 centímetros de grosor. Ademais, ao ter un peso inferior a 750 quilogramos pode ser transportada como se fose un remolque dun coche. Isto facilita o seu transporte por estrada sen que sexa necesario cargala nun remolque.

O concelleiro de Obras Públicas e Servizos Básicos, Blas García, explicou que “a finalidade da adquisición dunha trituradora é conseguir aproveitar a gran cantidade de residuos vexetais que se producen no concello, residuos que son resultado das podas en parques e xardíns e dos desbroces, así como da retirada de ramas e árbores que caen e todos aqueles residuos vexetais recollidos no punto limpo do concello.

“Deste xeito, os restos derivados dos procesos de desbroce e das podas forestais poden ser triturados no propio lugar onde se realiza o traballo e o material vexetal pode ser integrado e aproveitado polo chan forestal”, remata dicindo Blas García.

Esta máquina consegue triturar gran cantidade de residuos destas características nun marxe moi curto de tempo que logra reducir considerablemente o tamaño das mesmas. Ao introducir os elementos vexetais por un lado estes pasan ao receptáculo de trituración e saen polo outro lado convertidos en pedazos minúsculos.