As intensas chuvias causan inundacións e cortes de estradas no ámbito da Coruña

Inundacións

As intensas chuvias caídas nas últimas horas causaron numerosas incidencias, sobre todo inundacións e corte de rúas e estradas, unha situación que é especialmente difícil no ámbito da Coruña, a zona máis afectada.

Segundo confirmaron fontes de emerxencias, a chuvia caeu intensamente en distintos puntos de Galicia durante as últimas horas, especialmente no ámbito de Sada, Oleiros, Carballo e Cambre, onde a auga caída se sumou á preamar, que tivo lugar pasadas as 9.00 horas, provocando multitude de inundacións.

Efectivos de Protección Civil, Bombeiros, GES e corpos municipais traballan sen descanso dende a noite para estabilizar a situación, que é especialmente complicada en localidades como Sada, Oleiros ou Carballo. Ata primeira hora, o 112 rexistrara un total de 21 incidencias por este motivo.

En concreto, en Sada son múltiples as estradas inundadas en distintos puntos do municipio, onde tamén se rexistraron desprendementos. Os accesos ao núcleo urbano están colapsados e as rúas máis afectadas, segundo o alcalde, Benito Portela, son a Culleredo, Abegondo e Lagoa, cuxos residentes non poden saír das vivendas polo alto nivel da auga.

As chuvias nesta zona seguen sendo intensas, polo que a dirección do Instituto Isaac Díaz Pardo aconsellou aos alumnos non acudir ás aulas. No cámping de Gandarío, en Bergondo, foi necesario auxiliar algunhas persoas para que abandonasen as instalacións, afectadas pola auga.

EVACUADOS EN CARBALLO

Tamén están inundadas varias rúas, que están cortadas, garaxes e baixos da localidade coruñesa de Carballo, onde tiveron que ser evacuadas tres persoas dunha vivenda na rúa Muíño do Quinto. As bolsas de auga manteñen cortada a circulación en pistas, como a que une Bertoa e Razo, e estradas, como a DP-1914.

As chuvias afectan tamén ao municipio coruñés de Santa Comba, onde varias estradas están inundadas, segundo informaron dende o 112-Galicia; a Betanzos; e a Abegondo, que rexistra desprendementos na estrada Carral-Montouto.

A localidade de Oleiros sofre numerosas inundacións en rúas, vivendas e baixos; mentres que en Cambre se desbordaron os ríos Mero e Gándara e a auga afecta a vivendas e pistas.

Os bombeiros de Cee tiveron que intervir durante a madrugada na retirada dun desprendemento de terra e pedras na estrada AC-440, que une Berdoias e Muxía, que cortaba por completo a circulación.

VÍAS PRINCIPAIS AFECTADAS

Segundo a información da DGT, as inundacións afectan tamén a varios puntos da rede principal. En concreto, a AP-9 rexistra retencións por un embolsamiento de auga na saída cara a Betanzos, que mantén cortado un carril. Así mesmo, o firme está deteriorado na AC-441 ao seu paso por Zas (A Coruña) a causa das inundacións.

O vento do temporal tamén afecta á circulación na autovía A-8 entre Abadín e Mondoñedo (Lugo), onde a DGT pide que se circule con precaución.