Rescatan a unha muller cuxo vehículo arrastrou a corrente en Neda

Os bombeiros rescataron a unha muller que quedou atrapada nun vehículo que arrastrou a corrente desde o Barrio de San Nicolás, no municipio coruñés de Neda, até a parroquia de Xubia, na veciña localidade de Narón. Segundo informou o CAE 112 Galicia, por razóns que se descoñecen, a muller perdeu o control do vehículo, precipitouse por un barranco e foi parar ao río que pasa preto da Igrexa de Santa María, en Neda.

Varias persoas que observaron como a muller pedía auxilio lanzáronse coa intención de axudala. Finalmente, os bombeiros de Ferrol puxeron a salvo á condutora e a un dos seus rescatadores, mentres que outras dúas persoas que tamén participaron foron recollidas por unha embarcación particular.

Ademais dos efectivos de parque de bombeiros, tras recibir a alerta ás 19,00 horas, o persoal do CAE 112 Galicia pediu a colaboración dos membros do GES de Mugardos e dos axentes da Policía Local e da Garda Civil. Tamén se informou ao persoal de Urxencias Médicas 061, ao Servizo de Gardacostas e de Salvamento Marítimo.