O alcalde de Miño e o Partido Popular logran un acordo de goberno

O alcalde de Miño (A Coruña), Ricardo Sánchez -exmilitante de Compromiso por Galicia (CxG) e agora integrante de Miño Plataforma Aberta- e o PP lograron un acordo de goberno, cuxa sinatura se materializará este mércores ante notario, segundo confirmaron fontes consultadas.

Dende o PSOE, o seu voceiro local, Manuel Vázquez Faraldo, cualificou o acordo como unha repartición “de cadeiras e de soldo”. “Perdéronse oito meses”, asegurou, tras remarcar que se trata do “acordo inicial” ao que chegaron en xuño o PP e o alcalde de Miño, pero que non chegou a frutificar por diferenzas na repartición de áreas.

Así, nese acordo formulábase que o actual voceiro do PP de Miño e exalcalde, Jesús Veiga, entrase como primeiro tenente de alcalde o que, finalmente, acontecerá, segundo transcendeu do acordo e á espera de que se asine polas partes.

PACTO DE “PERDEDORES”

“Todo o que din Rajoy e Feijóo sobre que goberne a lista máis votada é unha falsidade”, argumentou tamén o voceiro socialista, que recordou que foi o PSOE quen obtivo máis votos nas pasadas eleccións municipais.

“Ao final todo era un problema de cadeiras e de soldo”, insistiu Manuel Vázquez Faraldo. Na mesma liña, indicou que o PP “se salta todos os principios” nun acordo que considerou “un pacto de perdedores”.

Por outra banda, cuestionou que o alcalde de Miño goberne co PP, tras rexeitar negociar cos socialistas, que si mantiveron reunións cos populares.

“Sorprende que un señor que se erixía como representante da esquerda consolide as políticas da dereita rancia”, indicou sobre Ricardo Sánchez, único representante que obtivo CxG en Miño e que foi expulsado desta formación tras negociar un acordo co PP, que, á súa vez, o apoiou na investidura.