Intervidos 300 litros de augardente de bagazo ocultos nun maleteiro en Sandiás

Axentes do Subsector da Garda Civil de Tráfico e de Seguridade Cidadá da Comandancia de Ourense aprehenderon 300 litros de augardente de bagazo ocultos no maleteiro dun Renault Safrane, de cor negra, cando se atopaban realizando un control na autovía das Rías Baixas (A-52), á altura do municipio ourensán de Sandiás.

Así o informou o Instituto Armado, que manifestou que os feitos sucederon sobre a madrugada do sábado pasado tras practicar unha proba de alcoholemia.

En concreto, os axentes sospeitaron de R.R.C.G., de 27 anos, e de C.S.R., de 53 anos, ambos os veciños de Ourense, cando despois de realizarlle ao condutor a proba de alcoholemia, o resultado foi de cero, a pesar de que do vehículo “manaba un forte cheiro a alcol”.

Segundo as mesmas fontes, “estrañados” os gardas civís, solicitáronlle aos ocupantes do vehículo que lles abrisen o maleteiro, o que lles permitiu comprobar que o “intenso cheiro” a alcol procedía das 20 garrafas de plástico de 15 litros cada unha, repletas de augardente branca de bagazo.

Como dita mercadoría carecía da documentación que acreditase a súa legal circulación ou distribución, unido a que ningún dos envases levasen precintos ou signos fiscais de circulación do correspondente Imposto Especial sobre Alcois, e como tamén carecían da etiquetaxe esixida pola regulamentación técnico-sanitaria, os axentes incautáronse de todo o produto.

A mercadoría foi entregada na Dependencia de Aduanas e Impostos Especiais de Ourense, onde se tramitará o oportuno procedemento sancionador.

A multa, segundo concretan as mesmas fontes, poderá alcanzar o cento por cento das cotas que corresponderían aos produtos, ao tipo vixente na data de descubrimento da infracción.