Ferida de gravidade unha muller que quedou atrapada entre un muro e un tractor en Muxía

Unha muller resultou ferida de gravidade ao quedar atrapada entre un muro e un tractor na parroquia de San Martiño de Ozon, no municipio coruñés de Muxía. Segundo informou o CAE 112 Galicia, o suceso tivo lugar pouco despois das 16,00 horas e ao lugar trasladouse o equipo médico do helicóptero con base en Santiago de Compostela. A muller presentaba feridas importantes, polo que foi evacuada de urxencia.

Ademais, pediuse a colaboración dos Bombeiros de Cee, que descartaron intervir posto que a ferida quedou liberada e accesible. Así mesmo, tamén se desprazaron os membros de Protección Civil de Muxía e os axentes da Garda Civil, alertados tamén polos xestores do 112.