Prisión provisional e sen fianza para o acusado do dobre crime de Arbo

O Xulgado de Instrución número 3 de Ponteareas decretou prisión provisional comunicada e sen fianza para o acusado do dobre crime de Arbo (Pontevedra) da parella que foi achada morta o pasado venres. Tras declarar durante tres horas, Arturo D., exmozo da muller falecida, foi enviado a prisión, a quen se lle imputan dous delitos de homicidio/asasinato, dado que está pendente de determinar. Pola súa banda, as dilixencias seguen declaradas secretas.

Á chegada aos xulgados de Ponteareas este luns un grupo dunha decena de persoas recibiu ao berro de asasino e con insultos ao único detido polo dobre crime. O home foi conducido aos xulgados nun furgón da Garda Civil e cando foi baixado para introducilo en dependencias xudiciais, foi axudado por axentes a cubrirse a cara.

Este home permanecía até este luns nos calabozos da Garda Civil tras ser detido o pasado venres, pero estábase á espera do resultado das dilixencias para determinar se se trata dun crime considerado de violencia machista. Nas inmediacións dos xulgados de Ponteareas tamén puido verse a polo menos un familiar do home morto.

Os corpos sen vida dos mozos Sergio Rodríguez Fernández, de 36 anos de idade, e Beatriz Rodríguez Mariño, de 30 anos, que levaban unhas semanas de relación sentimental, foron atopados nun monte da Telleira con indicios de recibir disparos, supostamente dunha escopeta. O home detido é afeccionado á caza.