Extinguidos os dous incendios forestais rexistrados nos municipios de Coirós e Aranga

Os dous incendios forestais iniciados na xornada do mércores nos municipios coruñeses de Coirós e Aranga quedaron extinguidos entre a pasada noite e a madrugada deste xoves. Segundo a información facilitada pola Consellería de Medio Rural e do Mar, o incendio declarado ás 17,14 horas do mércores en Coirós quedou extinguido ás 2,46 horas deste xoves.

Este lume afectou a unha superficie de dez hectáreas de arboredo, segundo concretou Medio Rural. Na súa extinción participaron un técnico, seis axentes forestais, seis brigadas, catro motobombas e un helicóptero. Pola súa banda, o incendio forestal que comezou ás 14,51 horas en Aranga quedou extinguido ás 23,28 horas do mércores, tras darse por estabilizado ás 21,03 horas.

Neste caso resultaron afectadas 3,2 hectáreas de superficie de arboredo e 0,3 de rasa. Na súa extinción traballaron dous axentes, tres brigadas e dúas motobombas.