Os danos causados no Concello de Baralla polo artefacto explosivo superan os 200.000 euros

Os danos ocasionados pola explosión dun artefacto no Concello de Baralla (Lugo), na madrugada do mércores, superan os 200.000 euros, segundo os cálculos aproximados que trasladou este venres o alcalde, o popular Manuel González Capón.

   Tal e como explicou o rexedor, a Casa Consistorial ten “bastantes danos”, polo que probablemente “haxa que derrubar as columnas da entrada e un alicerce”. Por iso, Capón estima que as dependencias desprazadas ao centro social non poderán volver ao edificio orixinal antes de “cinco meses”. “O interior da planta baixa hai que derruirlo todo. Hai que volvelo facer de novo”, sentenciou.

   Noutra orde de cousas, Capón volveu a desmarcar esta acción violenta das súas polémicas declaracións, hai un ano, xustificando os crimes do franquismo. “Iso xa está resolto”, lembrou o alcalde, que tras a polémica pedía desculpas.

   Os investigadores seguen agora a pista de Antón García Matos, alias Toninho, o suposto líder de Resistencia Galega ao que atribúen ser o inductor e o autor intelectual do atentado, aínda que deixaron a porta aberta a que poidan participar activistas sen fichar.

   Fontes da investigación confirmaron ademais que o mecanismo de retardo do “artefacto explosivo-pota”, que contiña cinco quilos de pólvora, era un “reloxo de pulseira”.