As hipotecas caen en Galicia un 14,9% en maio de 2014 con repecto ao ano pasado

O número de hipotecas constituídas sobre vivendas inscritas nos rexistros da propiedade en Galicia durante abril deste ano caeu un 14,9% en taxa interanual, ata un total de 677, segundo os datos difundidos este venres polo Instituto Nacional de Estatística (INE).

    Tras o descenso dun 20,8% que houbo no mes de marzo, en maio volve producirse unha caída no número de hipotecas constituídas en Galicia sobre vivendas, ao igual que acontece no total do Estado, onde descenderon un 3,4% neste período interanual, ata se situar en 17.963.

   As comunidades con maior número de hipotecas constituídas sobre vivendas en maio son Andalucía (3.284), Cataluña (2.800) e Comunidade de Madrid (2.731). Pola súa banda, as que presentan maiores taxas de variación anual son Valencia (23,6%), Asturias (17,8%) e Extremadura (13,7%).

   Así mesmo, as rexións con maiores taxas de variación mensuais do número de hipotecas sobre vivendas son Cantabria (46,3%), Aragón (44,7%) e Murcia (42,6%). Pola súa banda, as únicas que presentan descensos nas taxas de variación mensuais son Navarra (-31,1%), La Rioja (-27,4%) e Canarias (-5,6%).

CAPITAL prestado

   En canto ao capital prestado para a constitución de hipotecas en maio, Galicia rexistrou 57,1 millóns de euros, o que supón unha redución do 27,4% en taxa interanual e un aumento do 8,9% respecto a abril.

   No conxunto estatal, o capital prestado para as vivendas hipotecadas experimentou un recorte anual do 0,9%. Non obstante, as comunidades nas que se presta máis capital para a constitución de hipotecas sobre vivendas son a Comunidade de Madrid (399,9 millóns de euros), Cataluña (315,6 millóns) e Andalucía (277,7 millóns).

HIPOTECAS SOBRE O TOTAL DE TERREOS

   De acordo cos datos do organismo estatístico, durante o quinto mes do ano constituíronse en Galicia 1.126 hipotecas sobre terreos rústicos e urbanos (dentro destas últimas inclúense as vivendas). Destas, 66 leváronse a cabo sobre terreos rústicos e 1.060 sobre urbanas.

   Pola súa parte, no total de España, durante maio configuráronse 28.016 hipotecas sobre terreos rústicos e urbanos, cifra que supón un descenso do 8,6% respecto a maio de 2013.

TIPO DE INTERESE

   O tipo de interese medio para os empréstitos hipotecarios sobre vivendas alcanzou en maio o 3,82%, fronte ao 4,37% rexistrado un ano antes, mentres que o tipo de interese medio para o total de terreos se situou no 3,83%, cun prazo medio de 21 anos.

   O 94,3% das hipotecas constituídas en maio utilizou un tipo de interese variable, fronte ao 5,7% de tipo fixo. O Euríbor é o tipo de referencia máis utilizado na constitución de hipotecas a interese variable, en concreto no 86,5% dos novos contratos.

   En canto ás hipotecas con cambios registrales, en maio sumaron 19.942, o que supón un descenso interanual do 12,6%. En vivendas, o número de hipotecas que modifican as súas condicións baixou un 11%.

   Atendendo á clase de cambio nas condicións, en maio producíronse 15.874 novacións (ou modificacións producidas coa mesma entidade financeira), cun recorte interanual do 17,8%.

OPERACIÓNS

   O número de operacións que cambiaron de entidade (subrogacións ao acredor) aumentou un 13,5%, mentres que o número de hipotecas nas que cambiou o ben hipotecado (subrogacións ao debedor) creceu un 21,7%.

   Das 19.942 hipotecas con cambios nas súas condicións inscritas nos rexistros da propiedade en maio, o 36% debéronse a modificacións nos tipos de interese. Despois do cambio de condicións, a porcentaxe de hipotecas a interese fixo baixou do 6,6% ao 4,4%, e o de hipotecas a interese variable aumentou do 92,7% ao 95%.

   O Euríbor concentra a maior porcentaxe das hipotecas a tipo variable, tanto antes do cambio (75,2%) como despois (85,3%). Así, tras a modificación de condicións, o interese medio dos empréstitos nas hipotecas a tipo fixo baixou 1,21 puntos e das hipotecas a tipo variable reduciuse 1,22 puntos.