Rafael Louzán: “Suárez foi unha figura clave na historia do século XX en España”

“Suárez foi unha figura clave na historia do século XX en España, que se agranda co paso do tempo”. Así o asegurou o presidente da Deputación, Rafael Louzán, que quixo enviar o seu pésame á familia do ex presidente do Goberno, “pero tamén a todos cantos senten a morte dunha persoa que contribuíu enormemente a consolidar a democracia en España”.

Louzán, que lembrou as vinculacións de Suárez con Galicia e as súas estadías na Lanzada, recalcou a súa “herdanza política”, sustentada en tres piares básicos como son “a vocación de servizo público, a súa capacidade de diálogo e a busca do consenso”.

A xuízo do titular da Deputación, estas virtudes que definen ao que fora primeiro presidente da democracia en España, deben servir de exemplo nun tempo “no que ás veces tendemos máis a poñer o que nos separa por riba do que nos une”.

Louzán destacou que a “traxectoria impecable” de Adolfo Suárez fíxoo merecedor “do cariño e o aprecio de todo un país, que hoxe lamenta a morte dun político exemplar e dun verdadeiro home de Estado”.

Para o titular da Deputación, a súa actuación nun momento especialmente delicado da historia deste país, fixo posible que hoxe “vivamos en liberdade”. “Este país ten moito que agradecer á súa figura e á súa persoa”, reiterou.