O Plan cultural 2014 da Deputación de Pontevedra contará con 1.244 grupos, integrados por máis de 30.000 persoas

Un total de 1.244 grupos de toda a provincia participarán este ano no Plan cultural 2014, co que a Deputación de Pontevedra pretende seguir consolidando a enorme rede social que conforman as diferentes agrupacións culturais que se estenden por todos os concellos da provincia e que moven a máis de 30.000 persoas.

Rafael Louzán e a deputada responsable de Cultura, Ana Isabel Vázquez, destacaron o grande interese que esperta este programa, iniciado en 1981 e que cada ano conta cun maior número de grupos participantes.

De feito, nesta edición son 120 grupos máis ca en 2013 os que participan, pertencentes a 23 modalidades diferentes.

As máis numerosas son as masas corais (con 185 grupos participantes), seguidas dos grupos de gaitas (141), grupos folclóricos (140) e pandeireteiras (126). No outro extremo sitúanse as orquestras clásicas (con 4 participantes); os grupos de ballet (4); poetas (9) e humoristas (11).