O II Festival de Corais Deputación de Pontevedra estréase ante máis de 500 persoas en Matamá

Na noite do pasado sábado arrincou na Sociedade Cultural e Deportiva Atlántida de Matamá  a segunda edición do festival de corais organizado pola Deputación de Pontevedra.

O certame prolongarase durante todo o mes de febreiro en Vigo e permitirá que as 19 corais que non participaron na primeira parte do festival, desenvolvida durante os meses de novembro e decembro do 2013, poidan facelo agora ante todo o público da cidade.

As próximas actuacións terán lugar ó longo do seguintes tres fins de semana nos centros culturais ou veciñais de Valadares, Candeán e Cabral.

Este sábado, na parroquia de Matamá, máis de 500 persoas déronse cita para gozar do espectáculo.

O festival de corais organizado pola Deputación de Pontevedra é o maior evento destas características para as formacións corais de Vigo e a súa área de influencia de todos os que teñen lugar durante o ano.