Comezan os traballos de recuperación do santuario da Virxe da Barca coa retirada dos cascallos

Os traballos para retirar os cascallos do santuario da Virxe da Barca, en Muxía (A Coruña), seriamente danado tras o incendio que rexistrou o día de Nadal, comezaron este xoves, segundo confirmou o alcalde deste municipio, Félix Porto.

Pola súa banda, técnicos da Dirección de Patrimonio Cultural teñen previsto desprazarse até a igrexa “para ver como están os retablos e si é necesario a súa protección”, precisaron fontes da Consellería de Cultura.

Para poder proceder á reparación da igrexa, este xoves comezou a colocación das estadas co fin de poder retirar os cascallos “de lousa e outros restos que se atopan arriba da bóveda”, explicou o rexedor.

Estes traballos comezarán coa colocación primeiro dunha estada, para empezar a retirar parte dos cascallos. Unha vez finalizada esta parte, retirarase esta estada e colocarase noutro lateral da igrexa para acometer a mesma tarefa. 

AFECTACIÓN

Os labores de rebo está previsto que terminen “entre hoxe e mañá”, indicou Félix Porto. No entanto, sinalou que, si fose necesario “e o tempo permíteo”, continuaríase con eles o sábado.

“A partir de aí, poderemos ver o grao de afectación”, indicou o alcalde, quen precisou que o rebo levará a cabo de forma “que non quede sobre a bóveda todo o peso”, apostilou.

Sobre o custo dos mesmos, dixo que non está cuantificado. Así, precisou que o obxectivo é proceder a reparar a igrexa “e logo iremos vendo quen asume o custo”, apostilou.

Respecto diso, avanzou que a próxima semana está prevista unha reunión entre o Concello de Muxía, a Deputación da Coruña, a Xunta e o Arcebispado de Santiago para avaliar a situación.

EMERXENCIA DAS ACTUACIÓNS

Mentres, a Xunta axilizou os trámites para a reconstrución do santuario e declarou de emerxencia, na reunión do Consello do pasado venres, as actuacións para executar o proxecto de rehabilitación integral do templo.

Así, ao termo do Consello da Xunta, o titular do Executivo galego, Alberto Núñez Feijóo, anunciou a intención de impulsar a reconstrución do santuario “custe o que custe”. Tamén ratificou  que a reconstrución do templo acometerase “coa máxima celeridade” e a axilización dos trámites para que así sexa.

O custo de restauración das obras no que se refire á configuración arquitectónica situarase, segundo as primeiras valoracións dos técnicos de Patrimonio, entre os 700.000 e os 850.000 euros. A Xunta asumirá “o cento por cento” do custo do proxecto construtivo da rehabilitación.

En concreto, a Consellería de Cultura e Educación comprometerá 36.300 euros para a redacción do proxecto básico e de execución de rehabilitación do templo por parte da Dirección de Patrimonio Cultural.

Mentres, desde a Consellería de Cultura explicaron que Patrimonio autorizou ao Concello a colocar as estadas e que colaborará na restauración do santuario. Antes, técnicos achegaranse ao mesmo para determinar si os retablos “corren perigo”, apostilaron.