A Deputación de Pontevedra adxudica obras de mellora en 14 estradas da zona norte da provincia por 600.000 euros

A Deputación de Pontevedra adxudicou esta mañá as obras de mellora da capa de rodaxe e da sinalización horizontal de 14 estradas da zona norte da provincia. Os traballos foron adxudicados á empresa  Construcciones Taboada y Ramos por un importe de 573.661 euros.

O presidente da Deputación, Rafael Louzán, subliñou que foron 11 as empresas que presentaron ofertas para a execución destas obras, cunha baixa media do 17% sobre o orzamento de licitación, establecido en 691.260 euros.

Os traballos afectarán a vías nos concellos de Cambados, Sanxenxo, Meaño, O Grove, Meis, Vilanova de Arousa, Pontevedra, Caldas de Reis, Moraña, Cotobade, Lalín e Rodeiro.

O obxectivo é garantir o mantemento destas estradas e mellorar o seu estado actual. Aplicarase un tratamento antiesvarante e reporase a sinalización horizontal existente, co fin de reforzar a capacidade de freado e o control dos vehículos nos tramos que se atopan con este problema.

Ademais, limparanse as marxes con motoniveladoras e procederase á reapertura de cunetas, ó perfilado de noiros e á achega de material en recrecido de paseos.

Os traballos completaranse co marcado da vía, con franxas de 10 centímetros e de 15 centímetros, con pintura acrílica e microesferas de vidro.

Estradas nas que se van realizar as obras:

EP-9001 Castrelo-Couto de abaixo (Cambados)
EP-9005 Corbillón-Tremoedo (Cambados)
EP-9106 Praia do Carreiro (O Grove)
EP-9210 Acceso a Roxique (Sanxenxo)
EP-9301 Dena-Couto de Abaixo (Meaño)
EP-9403 Santo Tomé-San Salvador (Meis)
EP-9703 Vilanova-Ponte Arnelas (Vilanova de Arousa)
EP-0004 Marcón-Pintos A Reigosa (Pontevedra)
EP-8201 Moraña-Santa Xusta (Caldas de Reis-Moraña)
EP-0410 Igrexa-Loureiro (Cotobade)
EP-0408 Paraños-Trabazo (Cotobade)
EP-0409 Carballedo-Trabazo (Cotobade)
EP-6003 Soutolongo-Doade (Lalín)
EP-6203 Negrelos-Pedroso (Rodeiro)