Mil mozos xa están inscritos para acceder ás bolsas do Plan Práctica Laboral

Mil mozos titulados están xa inscritos para acceder ás bolsas do Plan de práctica laboral en empresas posto en marcha pola Deputación de Pontevedra. Os bolseiros teñen de prazo ata o 12 de novembro para presentar as súas solicitudes e acceder a unha das 424 bolsas convocadas, que lles darán acceso a un ano de traballo nunha das 379 empresas que participan no programa.

A Administración provincial, tal e como o anunciou esta mañá o seu presidente, Rafael Louzán, non só cubrirá todos os custos laborais dos bolseiros senón que sufragará os gastos dos recoñecementos médicos e dos cursos de formación en prevención de riscos laborais que deben realizar.

A necesidade de cubrir estes gastos púxose sobre a mesa na xuntanza que onte mantivo Rafael Louzán cos responsables das empresas participantes. Neste encontro o titular da Deputación pediu a “confianza” dos empresarios nesta Administración á hora de adecuar o perfil dos bolseiros ás necesidades da empresa.

Nesta liña, o presidente da Deputación amosouse convencido de que se cubrirán con éxito todas as prazas (malia que hai casos coma o dos técnicos informáticos; solicitáronse oito bolseiros con este perfil e só hai un inscrito nas oficinas de emprego da provincia) e que o programa rematará coa contratación laboral dos bolseiros.

Na xuntanza tamén se lles explicou ás empresas que, no caso de que o bolseiro renuncie á praza, o posto será cuberto polo seguinte aspirante a ese mesmo posto que quedase na lista de espera, mentres que se é a empresa a que renuncia ó bolseiro este poderá recolocarse noutra se hai un posto que se adapte ó seu perfil.

No tocante á posibilidade de que algún posto quede sen cubrir por falta de candidatos co perfil demandado, a empresa afectada poderá elixir outro perfil, sempre e cando se corresponda cunha das titulacións para as que se convocaron as prazas.