Nastasia: “Se consegues dicilo, consegues curalo. Se consegues cantarllo ao mundo, nin che conto”

Antes de nada imos explicar por que unha galega ten este nome Nastasia (risas). De nacemento non es galega, pero de corazón si…

Completamente! Nacín en Suíza e vivín alí ata os 12 anos. Logo miña nai e máis eu emprendemos unha aventura de vida dirección Galicia e ata hoxe! Pero xa neses 12 primeiros anos tivemos a sorte, meu irmán Pablo e máis eu, de pasar varios veráns na Terriña, entre Santiago e Porto do Son, polo que o aire do Atlántico leva tempo correndo polos meus pulmóns.

E no corazón tamén che vai a música, ou máis ben no sangue. O teu pai é músico, e a túa avoa tamén… Música clásica ademais, non si? Como che influíu todo isto?

Ter nacido nunha familia na que a música sempre foi un modo de vida ten moitas consecuencias positivas. É unha bagaxe de vida enorme, que te impregna dun coñecemento valiosísimo aínda que no momento non sexas plenamente consciente. Sempre estivemos metidos en todo o relacionado con ese mundo por mor dos traballos de meu pai (composicións para teatro, publicidade, espectáculos de danza, sonorización de debuxos, gravacións no seu estudio Panoramix a todo tipo de músicos…). E a isto teño que sumarlle a grande cultura e paixón musical de miña nai e miña avoa, que ademais era arpista e profesora de piano.

E que en canto a formación, isto é un máster!

Ter escoitado tanta música, tantos estilos, tantos cantantes e instrumentos, tantas maneiras de interpretar e de sentir a música… Isto si que é primordial para min, porque é a maneira de atopar despois a túa esencia, a túa identidade. Canto máis escoites, vexas, sintas, máis saberás e poderás dar.

Como definirías a túa música Nastasia? Hai incluso quen fala dunha Alicia Keys versión galega…

Sempre digo que non estou moi a favor das etiquetas, pero é certo que hoxe en día, e máis ca nunca, é importante poder “clasificar” o que fas para poder chegar ao maior número de xente posible… Dito isto, creo que a definiría como música de autor, creada dende o sentimento e o amor pola arte e as emocións. Ten influencias do soul, do pop, deixes do jazz, toques étnicos e de músicas do mundo. Unha fusión real e completa das emocións que vivo, sinto e quero transmitir.

Antes de decantarte polo canto creo que tamén lle deches a varios instrumentos. Ao final quedaches coa voz, por que?

Pois si, comecei co violín aos 6 aniños, e máis tarde paseime á batería. Disfrutei e aprendín moito cos dous, pero é certo que ata que non tiven as miñas primeiras clases de canto, con 11 anos, non sentín ese arreguizo interno de … “isto é o meu”. A voz é o instrumento que máis cedo captou a miña atención e o que máis me inspirou dende sempre.

Rastrexos, Odaiko, O Coro da Rá,… En cantos proxectos andaches metida? (Risas) En que punto se atopan cada un deles?

Hai que estar activo e facer todo o que poidas, todo suma!!! A verdade é que tiven, e teño, a sorte de formar parte de proxectos moi ricos musicalmente falando, e moi diferentes entre si. O feito de cantar nun coro supuxo moito na miña aprendizaxe, tanto como solista como sendo unha voz máis dun conxunto no que tes que empastar, afinar individual e colectivamente, escoitarte e escoitar aos demais, seguir as indicacións do director… Despois están as completas e complexas melodías de Rastrexos Project, compostas por Adrián Saavedra que é un grande amigo e músico. Ritmos africanos, latinos, tradicionais, jazz, reggae… cunha instrumentación percusiva que che obriga a ter o ritmo 100% metido no corpo para logo poder xogar, improvisar, crear… Son retos que ademais che achegan vivencias e constrúen a túa persoa.

Pero agora no que estás centrada é na túa carreira en solitario, non? Ves de presentar o teu primeiro videoclip; ‘Voar’. Gustaríalle a Nastasia Zürcher poder voar?

Para o que eu considero voar baixo esta forma de vida, si! E podo dicir que xa consigo facelo, agora só é “manter as minhas asas abertas”, como di a canción, continuar co voo xa emprendido. E para iso toca dar o seguinte paso, o paso real de mostrarme artisticamente tal e como son a través das miñas composicións. Sinto que chegou o momento e síntome lista para facelo, para crealo e para vivilo.

Como é este videoclip? É un adianto do que coñeceremos o próximo ano? Porque para o 2015 teremos o teu disco se todo vai ben…

Exactamente! Se todo segue así de fluído a principios de ano xa estará materializado. E por suposto, ‘Voar’ é unha pequena mostra do que soará nel. É un proxecto con moitas influencias e no que haberá pinceladas e acenos a moitos estilos.

Un disco no que te amosas por completo, moi intimista, moi profundo. Non da medo abrise dese xeito?

Cando te aceptas tal e como es, cando aceptas verte e ver as túas debilidades, as túas inseguridades, o que tes que traballar en ti, decátaste de que en realidade os límites son pura fantasía, de que os medos só son parte daquilo que che queda por limar e que aínda renegas de ti. Claro que é un reto persoal grandísimo abrirte e ser, pero é parte dese traballo de coñecemento persoal e de amor cara un mesmo. Se consegues dicilo, consegues curalo. Se consegues cantalo ao mundo enteiro, nin che conto… Liberación total!

‘Voar’ é ademais a única canción en galego que haberá no disco, que significa para ti cantar en galego? Por que decidiches facelo?

Para min Galicia significa o verdadeiro comezo nesta vida, a toma de contacto real comigo mesma. Cantar en galego é cantar dende dentro, dende o máis profundo. Por ese motivo tiña claro que quería que a miña carta de presentación fose nese idioma. É o máis sincero que teño. Ademais o galego é unha lingua belísima para cantar e para escribir! Pero tamén é certo que neste primeiro traballo só haberá unha canción na nosa lingua. O resto será practicamente todo inglés e algo de francés. Pasiño a pasiño.

Non fas unha música entendida como comercial, é máis difícil abrirse paso sen entrar nese círculo?

Ten unha parte máis laboriosa, si, porque tes que moverte máis para chegar á xente, pero por outro lado estás ofrecendo algo xustamente diferente e iso, opino, sempre é carta a favor. A autenticidade é o que marca que quedes ou marches. Ademais hoxe en día, coa enorme plataforma que dan as redes sociais, todo está máis á vista para todos. O factor determinante son os contactos e, por suposto, un produto de calidade e unha enteireza que comeza en ter claro o que queres e como queres conseguilo.

Adoitase dicir que un non é profeta na súa terra, que hai de certo nisto no teu caso? Marchaches para Madrid para continuar a túa formación, non sei se buscando tamén máis oportunidades…

 A verdade é que, querendo ou sen querelo, o feito de estar fóra sempre ten un compoñente exótico que en xeral gusta. No meu caso a meta era plenamente persoal e profesional, e isto mesmo está sendo! Obviamente compartir e publicar nas miñas redes sociais os pasos que dou axuda a que teñan interese en ti, directa ou indirectamente.

Volverás para Galicia ou polo de agora quedas por alá?

Volvo, e que ganas teño! Madrid é unha cidade incrible e sorprendeume para ben en todos os sentidos. Vivir aquí nesta etapa de vida foi o mellor que puiden facer! Ademais, compartir fogar coa miña amiga a actriz Sabela Arán (coa que tamén falamos neste xornal, no Plató Aberto) fixo que todo fose máis doce e fácil. Agora que xa me graduei e xa alcancei máis das expectativas que tiña postas aquí, toca volver para dar ese seguinte paso. Quero e preciso, estar na casa. Interiorizar para logo dar vida.

Dis que es realista e soñadora. Contraditorio?

Cada cousa no seu momento, igual que a música. Soñar é o que fai que esteamos vivos. Ser realistas é o que fai que consigamos os nosos soños.

E xa para ir rematando, como se presenta o verán Nastasia? Tes actuacións previstas, algunha xira? Onde te podemos ver? Onde podemos seguirte?

Este verán preséntase bastante tranquilo respecto a concertos. Preciso tempo para restablecerme en Galicia e poñer en marcha as cousas. Seguramente teremos actuacións con Rastrexos Project, e toda a información irémola poñendo no Facebook do grupo, e quizais algunha sorpresa máis que aínda non podo desvelar. Pero non dubidedes que irei avisando de todo! O Facebook e o Instagram de Nastasia Zürcher, así como o meu canal de Youtube e Soundcloud, están a tope e aí estará todo o que vaia facendo!

Estaremos atentos!!! Moitas grazas por ter conversado connosco!