Enviar a un amigo
Imprimir
Ensaladas de verán
|
Dra. en Farmacia |
NutriCoach: espazo de reflexión sobre os efectos dunha dieta sá e equilibrada na mellora da saúde e a vitalidade. Envíanos as túas consultas e a nosa especialista en nutrición, Amil López, axudarate. Poderás consultar nesta mesma sección as respostas á túa pregunta. Os datos persoais que nos facilites permanecerán ocultos, empregándoos unicamente de xeito interno. |
O obxectivo do verán é pasalo ben, relaxarse, gozar da familia e amigos e cargar pilas na praia, a montaña, en barco, etc. Compatibilizar a túa dieta co teu tempo de lecer non ten por que ser un problema. Para axudarche, propoñémosche 5 ideas de ensaladas para levar á praia ou de picnic, recomendámosche que leves o aderezo a parte e o engadas no momento de comelas. Os ingredientes son para 4 persoas.
Ensalada de sandía e aguacate
Ingredientes:
-100 g. de rúcula ou berros
– ¼ de sandía
-½ aguacate
-¼ cebola chalota en tiras
-200 g. arroz cocido
Para a vinagreta:
-1 lima
-1/4 pemento verde (pode ser un de Padrón)
-9 culleradas de aceite de oliva virxe extra e sal
Preparación:
Coce o arroz, corta a sandía en cubos, a cebola e a chalota en finas tiras. Dispón os ingredientes nun envase para levar e engade a vinagreta co pemento finamente picado.
Ensalada de arroz salvaxe con xerminados de soia
Ingredientes:
-200 g. de arroz salvaxe
-Unhas follas de leituga variadas
-100 g. tomates
-2 peras conferencia
-100 g. brotes de soia frescos
-8 culleradas de aceite de oliva virxe extra
-4 culleradas de zume de limón
-un chisco de sal e perexil
Preparación:
Coce o arroz salvaxe previamente lavado en auga salgada durante 25 minutos. Escorre o arroz, unta lixeiramente con aceite de oliva e deixa arrefriar. Lava os tomates e córtaos en gaios. Lava os brotes de soia, pela e curta en cubiños a pera. Prepara a vinagreta cun pouco de aceite, o zume de limón e sal. Mestura ata que emulsione. Prepara unha base de leitugas variadas, escorridas e cortadas. Encima pon o arroz salvaxe e os demais ingredientes. Adereza e deixa repousar uns 20 minutos.
Ensalada de chícharos con vinagreta de mazá e framboesa
Ingredientes:
-200 g. de chícharos conxelados
-1 cabaciña
-1 dente de allo
-Unhas follas de leituga variadas
Vinagreta de mazá e framboesas:
-4 culleradas de aceite de oliva virxe extra
-2 culleradas de vinagre de mazá
-½ mazá Golden
-8 framboesas
-un chisco de sal
Preparación:
Coce os chícharos cun chisco de sal durante 10 minutos. Refréscaos nun cazo, con auga e xeo, 5 minutos e escórreos. Lava e curta en taquiños a cabaciña. Saltea nunha tixola cunhas culleradas de aceite de oliva, un dente de allo e a cabaciña, deixándoo “al dente”. No último instante agrega ao salteado os chícharos. Monta unha base de follas de leituga, sobre elas dispón os chícharos e a cabaciña. Elabora unha vinagreta co vinagre, o aceite de oliva, un pouco de sal e os trociños de mazá e framboesas, removendo con coidado para que non rompan as framboesas.
Ensalada de cuscús, garavanzos e lazos de cenoria
Ingredientes:
-200 g. de cuscús
-100 g. garavanzos
-500 ml. caldo vexetal
-2 cenorias
-Uns fíos de azafrán disoltos nunha culler de auga fervendo
Para o aderezo:
-10 améndoas en láminas
-2 culleradas de aceite de oliva virxe extra
-1/2 limón
-1 cullerada de comiño
-1 cullerada de xenxibre
-Unhas follas de menta fresca
Preparación:
Coce os garavanzos, cando estean, corta o fervor con auga fría e reserva. Coce o cuscús nunha pota co caldo vexetal, azafrán e auga. Leva a ebulición e logo deixa repousar tapado 5 minutos. Corta as cenorias finamente en lazos coa axuda dun mondapatacas. Monta a ensalada.
Tosta as especias lixeiramente co aceite de oliva, incorpora as améndoas e o zume de limón. Engade o aderezo á ensalada e decora cunhas follas de menta fresca. Antes de servir, déixao marinar 20 minutos na neveira.
Ensalada de pasta á vinagreta de mel
Ingredientes:
-Unha base de follas verdes variadas
-200 g. de pasta de cores cocida
-12 tomatiños cherry
-200 g. champiñóns
Aderezo:
-1 limón
-1 cullerada de mel
-1 cullerada de mostaza de Dijon
-6 culleradas de aceite de oliva virxe extra
-1 cullerada de sementes de mapoula
-sal e pementa.
Preparación:
Mestura o zume de limón, a mostaza, o mel, o aceite, o sal e pementa. Coloca a ensalada sobre un envase para levar, adereza coa vinagreta e espolvorea coas sementes de mapoula.
Estas ensaladas son ideais como primeiro prato, se as queres como prato único podes engadirlle algunha fonte de proteína como atún, queixo, ovo duro ou pavo.
