publicidade hoxe

A Xunta aboa estes días case 16 M€ a máis de 4.000 gandeiros e agricultores galegos polas axudas da PAC de 2019

PUBLICADO EN: Noticias de GaliciaGaliciaPortada esquerda
A-
A+

A Xunta paga estes días case 16 millóns de euros a máis de 4.000 gandeiros e agricultores galegos polas axudas da PAC de 2019. En concreto, o Fondo Galego de Garantía Agraria (Fogga), dependente da Consellería do Medio Rural, comezou a aboar este venres as achegas correspondentes ás medidas de desenvolvemento rural da convocatoria do ano pasado.

Así, por unha banda, o Goberno galego está facendo fronte aos pagamentos da medida relacionada co agroambiente e o clima, ingresando aos beneficiarios máis de 13,6 millóns de euros por este concepto. Do mesmo xeito, está a aboar as axudas ao desenvolvemento rural correspondentes á agricultura ecolóxica, por un importe superior aos 2,2 millóns.

Canto á convocatoria da PAC de 2020, cabe lembrar que a Xunta vén de ampliar o prazo de presentación de solicitudes ata o 15 de xuño, para paliar as restricións levadas a cabo por mor do coronavirus, que impediron que moitos gandeiros e agricultores galegos se puidesen achegar aos bancos e ás entidades de aconsellamento para tramitar estas achegas.

Mentres, rematará o día 30 do mes que vén tanto o prazo de modificación das solicitudes únicas como o prazo de presentación das solicitudes de alegación do SIXPAC e das comunicacións da cesión de dereitos de pagamento básico.

O orzamento deste ano elévase aos 216 millóns de euros, dos que 170 millóns corresponden aos pagamentos directos á agricultura e á gandaría e ás axudas ao desenvolvemento rural suxeitas ao Sistema Integrado de Xestión e Control. Os outros máis de 46 millóns de euros irán dirixidos ás medidas de desenvolvemento rural (axudas a zonas con limitación naturais, agroambiente e clima, agricultura ecolóxica e para o mantemento de plantacións forestais en terras non agrícolas), que son as que a Xunta está aboando estes días da convocatoria pasada.

Prevese que uns 27.000 agricultores e gandeiros da comunidade soliciten ata mediados de xuño estas achegas de gran interese para o sector primario, xa que conseguen reducir as diferenzas entre a renda agraria e a urbana, á vez que potencian os agricultores realmente activos e prácticas agrícolas beneficiosas para o clima e o medio ambiente.

10 de maio de 2020 | 12:31 • Sen comentarios

Comentarios pechados.