publicidade hoxe
Publicidade
omeulibro1

O teléfono de atención e información 012 atendeu máis de 18.300 chamadas desde o inicio do estado de alarma

PUBLICADO EN: Noticias de GaliciaGaliciaPortada dereita
A-
A+

O teléfono de Atención e Información á Cidadanía -012- recibiu máis de 18.300 chamadas desde o inicio do estado de alarma ata o pasado martes, o que supón un 77% máis que nunha xornada ordinaria. Así, se o promedio de chamadas recibidas neste número é de 647, nos últimos 16 días superou as 1.100.

O teléfono 012 está a canalizar, con carácter xeral, a atención á cidadanía, tal e como acordou o Centro de Coordinación Operativa (Cecop) do pasado 16 de marzo. A través deste número estanse a atender as consultas non sanitarias dos cidadáns relacionadas co COVID-19, polo que funciona como un servizo multifuncional para informar aos cidadáns das súas dúbidas e preocupacións máis frecuentes sobre este tema en base a fontes oficiais co obxectivo de evitar a aparición de informacións erróneas.

O servizo de Atención e Información á Cidadanía reforzouse para dar resposta ao aumento do volume de chamadas durante a situación de emerxencia sanitaria. Así, desde o comezo do estado de alarma vense reforzando a dotación de recursos humanos, en concreto en máis dun 40%. Ademais, estendeuse a atención a festivos e fins de semana para potenciar o servizo mentres estea en vigor a situación sanitaria.

Os cidadáns poden contactar con este servizo a través do teléfono 012 (981 900 643 para chamadas realizadas desde fóra da comunidade autónoma) ou do correo electrónico 012@xunta.gal, para asesorarse e recibir información sobre os servizos prestados pola comunidade autónoma.

No 012 estanse a atender dúbidas relacionadas coas restriccións e as medidas adoptadas para frear o avance do coronavirus. As consultas máis frecuentes rexistradas neste número fan referencia á apertura e peche de negocios e empresas, ás axudas e prestacións ás que poden acollerse distintos colectivos, aos desprazamentos permitidos, ao mantemento do réxime de visitas de menores, así como á realización de trámites coa Administración autonómica e á suspensión de prazos administrativos.

Outro importante volume de chamadas están relacionadas coa aplicación dos expedientes de regulación temporal de emprego (ERTE). Por iso, a Xunta habilitou o teléfono gratuíto 900 815 600 para atender consultas dos cidadáns no eido económico e laboral, fundamentalmente vinculadas aos ERTE, e onde son atendidos directamente por profesionais da Consellería de Economía, Emprego e Industria.
Por outra parte, o Goberno galego reforzou o actual teléfono do voluntariado (900 400 800), integrado no servizo de Atención e Información á Cidadanía 012 cun servizo de axuda aos cidadáns, no que se lle dá prioridade a aquelas chamadas que alerten de situacións de vulnerabilidade ou emerxencia social.

O persoal que atende neste número está á disposición de persoas que necesiten apoio psicolóxico especializado que serán derivadas a un profesional deste ámbito se é preciso. Desde o teléfono social tamén se derivarán chamadas ás persoas anotadas nunha rede de voluntariado para conversa ou acompañamento telefónico a persoas maiores ou vulnerables. Ademais, esta liña serve para informar de posibles casos de especial vulnerabilidade e emerxencia social para buscar unha solución.

2 de abril de 2020 | 20:13 • Sen comentarios

Comentarios pechados.