Sanidade xa recomenda desde o 2017 a vacinación fronte ao sarampelo dos adultos nacidos dende 1968

Diante das informacións publicadas estes días nos medios de comunicación sobre a vacinación fronte ao sarampelo nas persoas adultas, a Consellería de Sanidade informa que, a súa Dirección Xeral de Saúde Pública xa recomenda, dende xullo de 2017, data da posta en marcha do Calendario de Vacinación do Adulto, a administración da vacina do sarampelo ás persoas nacidas a partir de 1968 que non cumpriran os criterios de inmunidade (ter pasada a enfermidade ou non ter recibido a vacina).

A antedita recomendación foi reiterada recentemente pola Consellería de Sanidade no documento publicado polo Programa Galego de Vacinación do pasado mes de xullo, e no que se aborda a Vacinación en grupos de risco de todas as idades e en determinadas situacións.

A Dirección Xeral de Saúde Pública tamén informa que non hai ningunha situación de alarma que desemboque nunha urxencia para vacinarse. Así, a susceptibilidade da poboación galega cara ao sarampelo é baixa, posto que un 98,2% das persoas de 18 a 64 anos amosan un nivel de anticorpos protector, segundo se desprende do estudio de seroprevalencia feito en Galicia no ano 2013, cumprindo os criterios da estratexia galega de eliminación da transmisión autóctona do sarampelo, e non existindo motivos para pensar que esta porcentaxe variara de xeito notable.

En consecuencia, dende a publicación do calendario do adulto no ano 2017, a Consellería de Sanidade xa recomenda aos sanitarios que, sempre que sexa posible, aproveiten os contactos asistenciais dos adultos co sistema público de saúde para revisar, e se fai falta, actualizar o seu calendario vacinal.

Por último, a Consellería de Sanidade sinala que aquelas persoas que teñan dúbidas ao respecto, deberán acudir ao seu médico de familia para que valore a conveniencia da vacinación, e reitera que non existe ningunha situación de alarma que obrigue á vacinación inmediata dos adultos.