Ethel Vázquez destaca a importancia das traídas municipais no rural galego
A conselleira de Infraestruturas e Mobilidade, Ethel Vázquez, salientou hoxe a importancia das traídas municipais no rural, unha singularidade que a Xunta incorporou ao Consello Reitor de Augas de Galicia e ao Consello Nacional. Así o manifestou na xornada organizada polo proxecto Life water way, co título Status quo das comunidades de usuarios de auga de consumo a nivel de Europa.
Neste encontro internacional, no que tamén interveu o director xeral de Saúde Pública, Andrés Paz-Ares, a conselleira puxo en valor esta peculiaridade galega que cómpre que as administracións teñan en conta, por iso a día de hoxe xa se coñece en Europa.
Sinalou que no abastecemento galego existen multitude de traídas veciñais e de pozos de uso privativo, que permiten resolver o servizo á poboación rural dispersa, concretamente a uns 600.000 galegos que se abastecen con opcións autónomas.
Subliñou que é preciso que todas as administracións e a sociedade se impliquen de xeito conxunto e coordinado para acadar o abastecemento de auga en calidade e cantidade, especialmente no ámbito rural.
Lembrou que as competencias sobre o abastecemento de auga as ostentan as entidades locais. Non obstante, a Xunta vén prestando apoio técnico e financeiro no desenvolvemento das súas competencias en canto a infraestruturas hidráulicas, coa realización de 300 actuacións en materia de abastecemento que beneficiaron a 186 concellos.
No que se refire ás infraestruturas, precisou que antes de executalas hai que contar cunha boa planificación e un correcto deseño e despois de construílas, considerar a axeitada explotación, xa que que puntualizou que é tan importante facelas como mantelas ben.
Tamén fixo referencia ao cambio de modelo como consecuencia do cambio climático, ao que é necesario adaptarse. Para isto, cómpre prepararse a través da coordinación e colaboración das administracións responsables, coa imprescindible axuda de técnicos, expertos na materia e a experiencia dos representantes das traídas veciñais.
A Xunta está avanzando neste camiño mediante a axuda na xestión e explotación dos sistemas e vén de autorizar unha orde de subvencións para que os concellos de menos de 50.000 habitantes poidan elaborar Plans de emerxencia fronte á seca. Tamén se avanza no ámbito normativo, co impulso da Lei de medidas de garantía de abastecemento.
Ethel Vázquez puxo como exemplo de implicación o proxecto Life Water Way, que reúne a todas as institucións que no seu día firmaron o convenio para mellorar a calidade das augas de consumo humano en 27 fontes do Camiño Inglés e que evitará o uso de 65.000 botellas de plástico ao ano.
Ademais engadiu outro exemplo como o proxecto Small Rural Suplies, financiado co programa europeo Life, que amosa que o abastecemento autónomo constitúe unha opción válida, competitiva e de calidade.