Enviar a un amigo
Opinar
ImprimirA Xunta celebra o segundo Encontro do Deseño galego co foco na innovación centrada nas persoas
A Xunta consolida a celebración do Encontro de Deseño para a Innovación Empresarial coa organización da segunda edición o vindeiro venres 28 de xuño no CIS Tecnoloxía e Deseño, en Ferrol, que porá o foco na innovación centrada nas persoas. Logo do éxito acadado no primeiro encontro, celebrado en 2018, búscase seguir abrindo canles de contacto e colaboración entre os profesionais do deseño e as empresas galegas, especialmente as pemes.
O evento, que terá lugar na véspera do Día Mundial do Deseño Industrial, permitirá coñecer as últimas tendencias de deseño a nivel internacional a través de profesionais galegos que son referentes no sector: Iván Mato, director creativo de Jones Knowles Ritchie e ex director creativo de Nokia; Coca Rivas, experta en deseño de servizos que traballa para o sector público do Reino Unido; Isaac Piñeiro, cofundador de Nadadora e fundador de Isaac Piñeiro Design Studio; Manuel Vázquez, consultor de deseño estratéxico e innovación para empresas como BBVA, Orange, Media Markt e Repsol; e Nuria Carballo, fundadora de Unconventional London e con proxectos para marcas como Timberland, Chanel, Evian ou Heineken.
A xornada completarase coa experiencia de dúas empresas na incorporación do deseño á súa estratexia de negocio: a multinacional Nationale-Netherlanden, da man do seu director de innovación, e a peme galega María Martínez Otero, a través da visión do seu director de obra civil.
Novas accións
Durante o encontro, o conselleiro de Economía, Emprego e Industria, Francisco Conde, fará balance do primeiro ano de traxectoria do Programa de Deseño para a Innovación 2020 e presentará as novas accións que a Xunta de Galicia está a promover para impulsar o deseño galego como ferramenta competitiva nas empresas, especialmente nas pemes.
Entre estas novidades figura a publicación ‘O deseño como motor. Casos de éxito’, que será presentada durante o encontro, e a Materioteca de Galicia, que acaba de ser inaugurada no CIS Tecnoloxía e Deseño e que os participantes na xornada poderán visitar. A ela súmanse un catálogo online de profesionais do deseño galego e unha iniciativa para difundir documentación en imaxes sobre a historia do deseño industrial en Galicia.
No encontro daranse cita deseñadoras e deseñadores galegos de todas as disciplinas (gráfico e comunicación visual, de produto e industrial, audiovisual e multimedia, espazos, moda e estratéxico), estudantes desta especialidade e representantes de empresas e doutras entidades interesadas en potenciar o deseño como ferramenta de innovación e competitividade nas súas organizacións.
O Programa de Deseño para a Innovación 2020 é a iniciativa coordinada pola Consellería de Economía, Emprego e Industria, a través da Axencia Galega de Innovación (GAIN), para abrir canles de contacto produtivas entre os profesionais do deseño e as empresas galegas, difundir casos de éxito e boas prácticas e impulsar o deseño como factor de competitividade para o tecido industrial de Galicia. Esta iniciativa está aliñada cos obxectivos dos dous proxectos europeos deste ámbito nos que participa GAIN: o Design4Innovation e o User-Factor, iniciativas de Interreg Europe e Interreg Atlantic Area orientadas a crear estratexias rexionais de deseño e garantir a súa implantación nas pemes.
