publicidade hoxe
Publicidade
omeulibro1

Emprega Paideia forma a 100 menores de 30 anos e persoas con capacidades diferentes en sectores emerxentes

PUBLICADO EN: Noticias de GaliciaLocal PortadaOleiros
A-
A+

O director xeral de Orientación e Promoción Laboral, Alfonso Marnotes, visitou hoxe en Oleiros aos alumnos e alumnas que se están a formar e realizar prácticas no programa integrado Emprega Paideia que se centra en sectores emerxentes como a economía verde e a industria musical e está dirixido a menores de 30 anos e persoas con capacidades diferentes. O encontro cos alumnos tivo lugar nas instalacións de Trébore Jardinería, onde se está a impartir formación en economía verde.

É a segunda edición desta iniciativa que desenvolve a Fundación Paideia co apoio da Xunta e nos seus primeiros catro meses xa acadou preto do 30% de inserción laboral dos participantes. O obxectivo é chegar ao 35% como mínimo, tal e como explicou Marnotes.

Os alumnos e alumnas, ademais, estanse formando noutras disciplinas como ofimática e mantemento de edificios e locais. Así mesmo, reciben cualificación en orientación na busca de emprego, idiomas e redes sociais aplicadas á procura dun emprego, entre outros. O programa integrado abarca as áreas territoriais da Coruña, Arteixo, Oleiros, Sada, Culleredo, Cambre, Bergondo, Betanzos, Miño, Curtis, Cabana de Bergantiños, Ponteceso e Ordes.

Marnotes destacou a importancia da formación adaptada ás demandas do tecido empresarial e sinalou que obxectivo destes programas é incrementar as oportunidades laborais dos participantes. “É un proceso destinado a mellorar a situación social e laboral das persoas a través de distintas fases e cunha intervención de carácter personalizado”, engadiu. Así mesmo, puxo en valor os plans que combinen formación e prácticas para dar resposta a un modelo de formación dual e flexible para acadar un emprego de calidade.

Para rematar, o director xeral salientou a importancia de adaptar as cualificacións aos perfís profesionais que precisan as empresas para competir, crecer e xerar emprego de calidade. Neste senso, destacou a cooperación entre a Xunta, concellos e entidades para acadar o máximo proveito dos programas integrados de emprego.

3 de abril de 2019 | 17:12 • Sen comentarios

Comentarios pechados.