A EGAP intensifica a formación dos empregados públicos na nova lexislación administrativa básica
Esta mañá oitenta empregados públicos iniciaron na Escola Galega de Administración Pública (EGAP) un curso superior centrado no estudo das leis 39/2015 e 40/2015, unha formación básica para conseguir unha xestión eficiente e eficaz do sector público.
Durante a inauguración da actividade, a directora da EGAP, Sonia Rodríguez-Campos, resaltou o esforzo da Escola por actualizar os coñecementos dos empregados públicos galegos en todas aquelas materias incidentes na Administración que revistan novidade mediante a oferta de formación continua, cursos superiores, cursos monográficos e xornadas. Ademais, destacou a boa acollida destas accións por parte do alumnado, reflectida nas elevadas cifras de matrícula.
En consecuencia, en 2018 a EGAP intensificou de maneira significativa as actividades relacionadas coa lexislación administrativa básica coa convocatoria de 22 cursos específicos e 1280 prazas. Ademais, fixo extensible esta formación a todos os empregados públicos de Galicia a través do programa de autoformación, unha iniciativa da Escola para ofertar contidos formativos sen límite de prazas.
Finalmente, Sonia Rodríguez-Campos destacou a importancia da nova normativa para os empregados públicos pola súa incidencia na organización e funcionamento da Administración.