publicidade hoxe
Publicidade
omeulibro1

A Xunta reitera o seu compromiso de mellorar a seguridade viaria na parroquia do Val, en Narón

PUBLICADO EN: Noticias de GaliciaLocal PortadaNarón
A-
A+

A conselleira de Infraestruturas e Vivenda, Ethel Vázquez, trasladoulle hoxe á alcaldesa de Narón, Marián Ferreiro, que a Xunta de Galicia mantén o seu compromiso de actuar para mellorar a seguridade viaria na parroquia do Val, para o que cómpre que o Concello redacte un novo proxecto de consenso cos veciños.

A conselleira lembrou que o Goberno galego incluíu no Plan de sendas de Galicia para a comarca de Ferrol o proxecto de execución dun itinerario peonil seguro e sostible de máis de 2 quilómetros na estrada AC-116, entre o Polígono do Río do Pozo e o cruce coa estrada AC-114, que dá acceso ao convento de Baltar.

Ese proxecto foi coordinado co Concello e sometido a información pública, incorporándose ao mesmo as achegas municipais, entre elas, a extensión da lonxitude da senda prevista e a incorporación dun ramal ata o dito convento, elevándose o Orzamento ata máis de 725.000 euros.

De acordo co pactado cos representantes municipais, a Xunta licitou e adxudicou as obras, pero unha forte oposición veciñal impediu o seu inicio a pesar dos reiterados intentos de diálogo por parte da Administración autonómica, que garantiu que se adaptaría o proxecto en todo o posible ás súas demandas.

Ante esta situación, e a pesar de consideralo un investimento positivo para mellorar a seguridade viaria no entorno do Val, a Consellería de Infraestruturas viuse obrigada a desistir da execución do proxecto aprobado, tal e como lle trasladou hoxe Ethel Vázquez á alcaldesa de Narón.

A conselleira de Infraestruturas convidou ao Concello a traballar polo consenso cos veciños e a deseñar un novo proxecto que cumpra os requisitos de mellora da seguridade viaria que conte coa súa aceptación e que poida ser executado pola Xunta de Galicia.

Así mesmo, Ethel Vázquez informoulle á alcaldesa de Narón que a Consellería de Infraestruturas analizará a execución da senda de acceso ao convento de Baltar de acordo co proxecto completo, incluíndo os servizos, que se comprometeu a presentar o Concello.

11 de setembro de 2018 | 16:16 • Sen comentarios

Comentarios pechados.