publicidade hoxe

A Xunta aumenta nun 30% as horas dispoñibles do concello de Malpica para a atención no domicilio de persoas dependentes

José Manuel Rey Varela na reunión co primeiro edil de Malpica

José Manuel Rey Varela na reunión co primeiro edil de Malpica

A Xunta de Galicia incrementou o presente ano en case un 30% as horas habilitadas para a atención a domicilio de persoas dependentes do municipio de Malpica de Bergantiños. Así, o novo reforzo desta prestación levado a cabo o pasado mes de agosto pola Administración autonómica eleva por riba das 42.500 horas anuais que ten dispoñibles este concello coruñés para ampliar a cobertura do Servizo de Atención no Fogar (SAF-Depedencia), o que supón un incremento de case o 90% no trienio comprendido entre os exercicios de 2015 e o actual de 2018.

A atención ás persoas maiores foi un dos asuntos abordados na xuntanza de traballo que o conselleiro de Política Social, José Manuel Rey Varela, mantivo esta mañá co primeiro edil de Malpica, Eduardo José Parga Veiga. Esta reunión enmárcase no diálogo permanente que este titular do Goberno galego mantén cos responsables das corporacións municipais co obxectivo de avanzar no desenvolvemento das mellores políticas sociais de proximidade mediante o fortalecemento da coordinación e colaboración entre administracións.

Así mesmo, ambos mandatarios abordaron o inicio do curso escolar na escola infantil de 0 a 3 anos da Galiña Azul coa que conta a vila. Un centro de 42 prazas distribuídas en tres unidades que este curso practicamente cubriu a totalidade das solicitudes de admisión que recibiu, quedando soamente catro en lista de agarda provisional. Ao respecto, o titular de Política Social lembrou que as familias que así o teñan pedido se poderán acoller ao programa Bono Concilia e recibir unha axuda de entre os 45 e os 250 euros mensuais, a contía varia en función da renda da unidade familiar, para contribuír ao pago de praza na escola infantil que elixan e que non conte con financiamento por parte da administración

Por último, Rey Varela e o rexedor de Malpica amosaron a súa disposición a continuar neste camiño de colaboración e coordinación entre institucións na procura de contar coas mellores políticas sociais e prestar uns servizos de calidade.

11 de setembro de 2018 | 16:40 • Sen comentarios

Comentarios pechados.