A Policía Autonómica realiza 105 inspeccións para velar polo cumprimento da Lei de prevención de bebidas alcohólicas en menores

Axentes do grupo de Menores da Policía Autonómica levaron a cabo entre o 3 e o 9 de setembro un total de 105 inspeccións de control en 10 concellos galegos.

Por parte dos distintos Grupos de Menores da Policía Autonómica da Coruña, Lugo, Ourense, Vigo e Santiago de Compostela nesta pasada semana realizáronse 32 dispositivos de control de menores en risco de desamparo (absentismo escolar e consumo de alcohol/tabaco e drogas en menores de idade), nos concellos da Coruña, Santiago de Compostela, Tordoia, Trazo, Chantada, Lugo, O Bolo, Ourense, Cambados e Vigo.

Como resultado do dispositivo levado a cabo, foron identificadas 46 persoas e inspeccionadas 105 zonas de ocio, locais e centros comerciais. Levantáronse 2 actas de infracción, unha por infracción na venda de alcol e outra na venda de tabaco.

A Policía Autonómica, dende a entrada en vigor da Lei 11/2010, de prevención de bebidas alcohólicas aos menores de idade, leva a cabo diversos dispositivos policiais por toda a Comunidade Galega, para velar polo cumprimento da mesma e previr o consumo deste tipo de bebidas polos menores de idade.

Nestes dispositivos, ademais das denuncias pola infracción da Lei 11/2010, tamén se informa aos propietarios dos locais do seu contido, das actuacións que deben levar a cabo para o cumprimento da mesma e evitar o consumo de alcol entre os menores de idade, así como, que por parte da Policía Autonómica se continuará coas actividades necesarias para velar polo cumprimento da norma.