A Consellería de Medio Rural cede varios terreos a concellos galegos para desenvolver infraestruturas de interese común

O Diario Oficial de Galicia (DOG) publica hoxe diversas resolucións da Axencia Galega de Desenvolvemento Rural, dependente da Consellería do Medio Rural, pola que se fan público diversos acordos de cesión en propiedade de terreos que estaban no Banco de Terras de Galicia a diferentes concellos para levar a cabo infraestruturas de interese xeral.

Logo da aprobación da Lei de Mobilidade de Terras, estableceuse un mecanismo para a cesión gratuíta aos concellos de parcelas propiedade da entidade xestora do Banco de Terras cun interese social determinado para os veciños. Trátase de terreos procedentes de masas de reestruturacións parcelarias que foron aportadas polos propios habitantes durante o procedemento de concentración.

Nesta ocasión cédense 10 predios para os concellos de Mesía (3), Boqueixón (2), Boimorto (1), Coirós (1), Trazo (1) e Baleira (2). Con esta cesión gratuíta, os concellos poden proceder a executar obras de interese xeral para os veciños e así mellorar a calidade de vida dos habitantes do medio rural galego.

A maioría destes terreos son para albergar novas estacións depuradora de augas residuais, para a construción de aparcadoiros e áreas recreativas, puntos de recollida de plásticos de silos, campos de fútbol, etc. Trátase, por unha banda, de regularizar o patrimonio da Xunta de Galicia, permanecendo no Banco de Terras só aqueles predios con interese agrario e, por outra, que os concellos poidan dispoñer de terras para un uso colectivo ou de interese social.

Estudo de novas cesións

Neste momento estase a estudar a cesión de arredor de duascentas parcelas con diferentes tipoloxías (espazos de lecer, depuradoras, infraestruturas de rega e abastecemento de augas, etc), unha vez rematado o procedemento de recoñecemento de titularidade a concellos ao abeiro da Lei de Mellora Territorial Agraria de Galicia (Metaga).