A Xunta enxalza as primeiras melloras paisaxísticas realizadas no Pico Sacro grazas aos ‘Premios Galicia Parabéns’

A directora de Turismo de Galicia, Nava Castro, e o delegado territorial da Xunta na Coruña, Ovidio Rodeiro, acompañados polo alcalde do Concello de Boqueixón, Manuel Fernández, visitaron hoxe as obras de posta en valor do Pico Sacro e a súa contorna, un dos proxectos galardoados na primeira edición dos Premios Galicia Parabéns cos que Turismo de Galicia recoñece o esforzo dos concellos galegos por impulsar o embelecemento de Galicia, a paisaxe e o patrimonio.

Como froito dos primeiros traballos realizados é visible xa unha mellora paisaxística importante tras a demolición de elementos de formigón na subida ao cumio e tras a limpeza da contorna e a plantación de árbores autóctonas. A visita serviu, ademais, para comprobar os avances que se están executando para reacondicionar o Centro de Interpretación do Pico Sacro e a substitución de estruturas por outras de tipo vexetal, na contorna do cumio.

“A protección e conservación de Galicia é unha tarefa que trascende a unha ou a outra administración, e un compromiso colectivo que estes premios saben recoñecer”, indicou Nava Castro durante a visita.

Xunto aos traballos realizados, o premio, dotado con 400.000 euros, tamén fará posible que o Concello de Boqueixón implante un novo sistema de sinalización mediante ferramentas tecnolóxicas e poña en marcha unha App móbil que dinamice a actividade turística desta zona estratéxica da Vía da Prata, un dos nove itinerarios do Camiño de Santiago, que demostra a crecente diversificación de fluxos na ruta xacobea e que está incluído na planificación do Plan director do Camiño de Santiago do Goberno galego para o ano 2019 No que vai de ano, este itinerario foi escollido por máis de 1.700 peregrinos.

Novo establecemento

Ademais de comprobar os avances no Pico Sacro e na súa contorna, a visita da directora de Turismo e do delegado da Xunta na Coruña incluíu a inauguración do primeiro albergue privado aberto neste concello coruñés e que completa a oferta aloxativa na Vía da Prata. O novo establecemento, a Raíña Lupa, ofrece preto de 20 prazas, conta con diferentes servizos para os peregrinos e demostra a iniciativa emprendedora turística neste concello.

Os Premios Galicia Parabéns alíñanse coa Estratexia do turismo de Galicia 2020, que dedica case o 40% dos seus recursos ás iniciativas relativas á conservación da paisaxe, recursos naturais e sustentabilidade. Na súa primeira edición, o Goberno galego premiou, tamén ao Concello de Portomarín, polo seu proxecto para reordenar o Parque Agustín do Río. Turismo de Galicia convocou este ano a segunda edición destes galardóns, por unha contía global de 800.000 euros, cos que se distinguirá dúas novas iniciativas de embelecemento nos concellos galegos, que recibirán 400.000 euros cada unha.