Lugo mantense á cabeza de Galicia nos plans de mellora das explotacións con máis de 500 solicitudes

A conselleira do Medio Rural, Ángeles Vázquez, visitou hoxe unha explotación de reprodución de leite no municipio lugués de Xermade e aproveitou para sinalar que ata 500 explotacións da provincia pediron unha axuda para renovar as súas granxas a través dos plans de mellora da Xunta co que, de novo, sitúase á cabeza de Galicia. Só as solicitudes de Lugo suporán un investimento superior aos 61 millóns de euros, segundo explicou Ángeles Vázquez. En toda Galicia, poderían superarse o millar de peticións.

O prazo de solicitude pechouse o pasado día 16 e agora comeza o estudo de solicitudes desta liña, así como da de incorporación de mozos e das pequenas explotacións. En total o orzamento desta orde de axudas ascende a 65 millóns de euros, das que 40 está previsto que vaian aos plans de mellora.

A mesma cifra achegouse na convocatoria de 2017, cando 629 agricultores e gandeiros recibiron unha subvención deste tipo. Ademais 466 mozos obtiveron unha axuda pola súa incorporación, así como outras 154 pequenas granxas. En total, máis de 57 millóns de euros nesta liña de axudas.

“Dende a Consellería do Medio Rural o que se pretende é que os mozos queden no rural con calidade de vida e o xeito de facelo é coa modernización e ampliación das granxas para facelas máis competitivas”, declarou Ángeles Vázquez.

Explotación de referencia

A conselleira do Medio Rural ofreceu estes datos na visita celebrada a unha granxa de Xermade cun censo de máis dun cento de animais e integrada na ADSG leite de vaca certificada de cooperativa. Esta empresa foi beneficiaria desta liña de axudas en varias ocasións, a última en 2017, cando ademais da incorporación á granxa do fillo dos titulares, presentaron un “ambicioso” proxecto cualificado de excepcional pola propia consellería debido ao seu investimento, que alcanza os 360.000 euros e para os que ten asignada unha axuda de 180.000 euros.

Con este orzamento está previsto facer unha completa renovación que incluirá a fosa, unha nova corte e sala de muxidos, cubertas e almacéns. “Trátase dunha explotación de referencia para a contorna”, sinalou Ángeles Vázquez, quen lembrou que foi ademais beneficiaria dos premios Exceleite pola calidade do seu leite.