O Consello Galego de Turismo impulsa a distinción como festa de interese turístico da Semana Santa de Santiago

Nava Castro no Consello Galego de Turismo de Galicia. Foto: X. Crespo

O Consello Galego do Turismo de Galicia acordou hoxe que a Semana Santa de Santiago de Compostela avance no seu recoñecemento como festa de interese turístico de Galicia, unha decisión que tamén se estende a outras celebracións como a Feira do Butelo da localidade lucense da Fonsagrada e a Festa do Caldo de Mourente, en Pontevedra.

Os membros deste órgano emitiron un informe favorable nos tres casos e apelaron, ademais, á rigorosidade á hora de conceder a declaración de festas de interese turístico de ámbito autonómico. O acordo acadado hoxe é o paso previo á elevación destes informes ao Consello de Goberno da Xunta, o órgano encargado de resolver este tipo de recoñecemento.

“Tanto o sector como o Goberno galego demostramos a nosa aposta decidida por promover a Semana Santa galega, unha festividade en alza na nosa Comunidade”, explicou Nava Castro ao tempo que recordou as outras cinco festas deste tipo que xa teñen este recoñecemento –a de Fisterra, Santa María de Paradela (Meis), Cangas, Mondoñedo e Betanzos- ás que se suman outras dúas -a de Ferrol e a de Viveiro- coa distinción no ámbito internacional.

Durante a xuntanza, os membros do Consello Galego do Turismo valoraron as cifras turísticas rexistradas o ano pasado, cando se superou por vez primeira o dato dos cinco millóns de viaxeiros e se constatou que o turismo galego está a medrar en todos os parámetros da man da calidade. Tamén se analizou o mapa da distribución do aloxamento regrado en Galicia facendo balance do Decreto de vivendas de uso turístico que, a piques de cumprir un ano desde a súa posta en marcha, supuxo o rexistro de preto de 5.000 vivendas que suman máis de 25.000 prazas repartidas por toda a xeografía galega.

Rigorosidade do decreto

Os membros deste órgano celebraron tamén a decisión do Tribunal Superior de Xustiza de Galicia (TSXG) que nos últimos meses ratificou dobremente o seu respaldo á rigorosidade da normativa galega, desestimando ao completo os recursos presentados pola Comisión Nacional dos Mercados e a Competencia (CNMC) e por unha asociación do sector.

Deuse conta tamén das actividades que Turismo de Galicia está a levar a cabo en materia de desenvolvemento lexislativo, como o proxecto de decreto de campamentos que se está a tramitar, así como das actuacións no eido da promoción e proxectos europeos con iniciativas como a participación de Galicia na nova ruta europea de turismo de mergullo, os proxectos Eurovelo e Loci Iacobi, no eido xacobeo ou Xêrés-Xurés referido ao turismo de natureza.