Continúa aberta ata o 23 de marzo a inscrición no Programa de Conciliación de Semana Santa

A Concellaría de Educación e Cidadanía mantén abertas ata este vindeiro venres, 23 de marzo, a inscrición e matrícula no Programa Municipal de Conciliación de Semana Santa. As actividades desenvolveranse os días 26, 27 e 28 de marzo e 2 de abril no CEIP As Fontiñas e no CEIP Raíña Fabiola. Hai un total de 100 prazas, 50 para cada un dos centros.

Este programa proporciona un espazo educativo e promoción do lecer, ademais de ser unha alternativa de conciliación para as familias no tempo de vacacións da Semana Santa. O horario da modalidade completa será de 7:45 a 16:00 horas. O servizo de madrugadores funcionará de 7:45 a 9:00 horas, mentres que os obradoiros e actividades se realizarán de 9:00 a 14:00 horas. Finalmente, entre as 14:00 e as 16:00 horas, existe a posibilidade de solicitar o uso do servizo de comedor.

Poden participar nenos e nenas empadroados no Concello de Santiago de Compostela ou que cursen estudos en centros de educación infantil e primaria de Santiago de Compostela, con idades comprendidas entre os 3 e os 12 anos. Teñen a opción de escoller entre participar todos os días do programa ou en días soltos.

A inscrición realizarase a través Rexistro Xeral do Concello de Santiago (rúa do Presidente Salvador Allende, 4) ou no Rexistro Auxiliar do Centro Sociocultural e Xuvenil Municipal do Ensanche (rúa de Frei Rosendo Salvado 14-16), cubrindo o formulario dispoñible nesta web, no Departamento de Educación e Cidadanía ou nos propios rexistros. Xunto co impreso achegarase o xustificante do pagamento da matrícula. A admisión será por rigorosa orde de inscrición ata cubrir as prazas dispoñibles.