A Xunta apoia o labor de Cogami e renova o seu compromiso cun investimento de preto de 379.000 euros

Ovidio Rodeiro na visita ao centro de reciclado en Santiago

O delegado territorial da Xunta na Coruña, Ovidio Rodeiro, visitou esta mañá as instalacións do Centro de Reciclado de Galicia (Coregal), destinado á Xestión Integral de Residuos, e pertencente a Galega de Economía Social, matriz do grupo de Centro Especiais de Emprego de Iniciativa Social de Cogami, entidade que está constituída por máis de 50 asociacións e delegacións da discapacidade física e orgánica.

Cogami ten como obxectivo conseguir a plena inclusión das persoas con discapacidade en todos os ámbitos da sociedade, a través da defensa e promoción dos seus dereitos, da reivindicación do cambio social, da potenciación do asociacionismo e da prestación de servizos que satisfagan as súas necesidades e expectativas.

Coregal é unha das súas empresas dedicada á xestión medioambiental integral, cualificada como Centro Especial de Emprego de Iniciativa Social. Traballa para acadar a máxima redución, reutilización, reciclaxe e valorización de todos os residuos. Conta cunha rede de servizos, dentro do sector dos residuos reciclables ou valorizables, distribuída por toda Galicia en cinco eco-plantas: Santiago de Compostela, Mos, Boiro, Carballo e Narón.

Coregal foi fundada no año 1994 con catro empregados. Na actualidade con máis de 125 traballadores, dos cales máis do 90% teñen algunha discapacidade e cunha flota de 45 camións. O principal obxectivo desta entidade é crear emprego estable e de calidade para persoas con discapacidade, para o que posúen dende 1994 o certificado de centro especial de emprego.

Ovidio Rodeiro destacou que este centro conta co apoio directo da Consellería de Economía, Emprego e Industria a través dunha axuda de preto de 545.000 euros entre os anos 2017 e 2018. Neste ano recibirán 379.000 euros destinados ao abono das nóminas dos traballadores con algunha discapacidade.

“Esta colaboración pretende ser un apoio para que esta entidade poida prestar un servizo medioambiental integral na provincia”, sinalo Rodeiro. O delegado territorial remarcou a importancia deste tipo de axudas “porque van orientadas á creación e consolidación de postos de traballo estables que permiten a integración no mercado laboral de persoas con discapacidade” ofrecendo uns servizos competitivos e de calidade.