O sector da planta ornamental consolídase en Galicia cunha facturación anual de 398 millóns de euros

Belén do Campo na inauguración da feira Arco Verde

A directora xeral de Gandaría, Agricultura e Industrias Agroalimentarias, Belén do Campo, asistiu esta mañá á inauguración da IX edición da feira Arco Verde e XV exposición de produtores de planta de Galicia, no recinto feiral de Amio. Alí destacou o peso que ten este sector na economía galega, xa que factura máis de 39 millóns de euros ao ano e se consolida como un eido produtivo clave ao dar emprego a máis de 1.500 traballadores directos.

Belén do Campo sinalou que o sector da planta ornamental resulta especialmente atractivo en termos de rendibilidade agraria, xa que é un dos cultivos que máis renda xera por unidade de superficie. Así, explicou que Galicia é con diferencia a maior produtora de camelia a nivel europeo, consolidándose tamén a nivel nacional na produción de hortensia, rododendro, azalea, abelia, acivro e coníferas de peche.

No tocante aos datos de exportación, a directora xeral indicou que dos 39 millóns facturados no ano 2016, o 20% correspóndense á ventas no exterior, converténdonos na quinta comunidade que máis exporta a nivel nacional. Se analizamos o mercado internacional, os principais destinos da planta galega son Francia, Alemaña, Reino Unido e Portugal.

Belén do Campo aproveitou a súa intervención para agradecer o traballo que realiza a Asociación de Viveristas del Noroeste (Asvinor), que aglutina a 37 produtores responsables do 82% da produción de planta de Galicia. Cifra que, segundo explicou, chega aos 291 produtores galegos inscritos no Rexistro Nacional de Productores de Semillas y Plantas de Vivero (Prosemplan).

Feira Arco Verde

Os asistentes á IX feira Arco Verde poderán desfrutar de charlas técnicas para profesionais da produción e venta de planta ornamental, así como outras de carácter máis técnico relacionadas coa mellora da xenética do castiñeiro, caracterización de variedades autóctonas de mazás de sidra, sanidade vexetal e técnicas comerciais.