A UE escolle a Galicia para participar nun foro que avalía as posibles consecuencias do brexit nas rexións europeas
Representantes da Xunta de Galicia participan hoxe en Bruxelas nun foro que avalía as posibles consecuencias e o impacto territorial da saída do Reino Unido da Unión Europea. A comunidade de Galicia é a única de España que foi invitada polo Comité das Rexións para amosar a súa opinión ao respecto do Brexit, especialmente en relación ao seu impacto sobre o sector marítimo-pesqueiro e para plasmar os aspectos sometidos ás incertezas que supón o proceso.
Deste xeito, Galicia enriquecerá coa súa experiencia os debates que se realicen no marco do foro que foi deseñado para expor diferentes estudos de carácter económico e de mercado realizados polo Comité das Rexións e pola Universidade de Birmingham e así compilar o parecer das diferentes rexións e sectores económicos.
Galicia fixo fincapé no impacto que sobre os eidos sociais e económicos pode ter un Brexit duro no relativo ao acceso ás augas británicas e á complicación que pode supor o carácter deste aspecto en rexións ultraperiféricas como Malvinas. Neste senso, apuntou a incerteza que pode traer este proceso para os buques de bandeira británica pero capital galego, destacando a importancia dos investimentos realizados neste eido.
Ademais, sinaláronse as dificultades dos novos sistemas de decisión que en materia de xestión e ordenación pesqueira haberá que pór en práctica, especialmente no reparto de cotas no seo da Comisión de Pesquerías do Atlántico Nororiental (NEAFC), sobre todo tendo en conta que a reasignación de cotas para a frota británica foi unha das bandeiras nas que o sector pro-Brexit baseou a súa campaña. Tamén foron apuntadas as afectacións que a saída do Reino Unido pode ter sobre a consecución de obxectivos da Política Común de Pesca, como a minoración de descartes ou o Rendemento Máximo Sustentable.
O resto das comunidades autónomas españolas están representadas neste workshop a través da Conferencia das Rexións Periféricas e Marítimas (CRPM), unha asociación de 160 rexións de 24 países de Europa e a súa contorna, que tamén participa no encontro. Así, aportaron as súas inquedanzas rexións europeas de Alemaña, Rumanía e Suecia. Tamén os diferentes representantes do sector privado, como as entidades bancarias ING, KBC ou o Porto de Zeebrugge (Bélxica).
Accións da Xunta
Cabe recordar que a Xunta de Galicia vén participando activamente en diversos foros que se veñen organizando desde que se tivo coñecemento do Brexit. Neste sentido, desde a Xunta veuse traballando desde o primeiro momento na avaliación do posible impacto deste proceso na economía pesqueira. Por iso, tan pronto se coñeceu que o Reino Unido quería saír da Unión Europea, a Consellería do Mar encargou un informe ao Instituto Universitario de Estudos Europeos, “Salvador de Madariaga”, da Universidade da Coruña, para avaliar as consecuencias do Brexit para a pesca galega.
Tamén se solicitou outro informe á profesora de Economía Aplicada e experta en Economía Pesqueira da Universidade de Santiago, María do Carme García Negro, para analizar aspectos do eido económico como o posible impacto por cese da pesquería e de acceso ás augas, principalmente dos buques que faenan en augas británicas e malvinas. Ademais, estanse a aproveitar diferentes oportunidades para buscar rexións e estados membros aliados na defensa de intereses comúns. De feito, fomos a primeira comunidade que asinou a declaración de apoio ás comunidades pesqueiras que promove a Alianza Pesqueira Europea.
A maiores, Santiago acollerá vindeiro luns día 26 un seminario no que distintos países europeos poñerán en común a información de interese e sumarán argumentos para a defensa do mar nas negociacións do Brexit. Nel participarán representantes do sector de Galicia e do resto de España e tamén de países como Holanda, Alemaña, Bélxica, Francia e Irlanda, países que teñen intereses comúns na defensa dos sectores do mar.
O foro que se celebra hoxe dá continuidade ao celebrado a mediados de novembro do ano pasado en Cardiff, no que participou o presidente da Xunta, Alberto Núñez Feijóo, e no que se avaliou tamén o impacto que terá nas comunidades da Europa periférica e marítima, como Galicia, a saída do Reino Unido da Unión Europea. Naquel encontro asinouse a Declaración de Cardiff, un documento aprobado pola Asemblea Xeral da CRPM que recolle o posicionamento e as reivindicacións destas rexións ante o Brexit.
A participación de Galicia neste foro é unha mostra máis do papel activo que está a ter a nivel europeo á hora de defender os seus intereses durante as negociacións entre a Unión Europea e o Reino Unido e ante o novo escenario que se abrirá cando estas rematen. Boa proba desta implicación é que Galicia lidera un grupo de traballo específico sobre o Brexit na Comisión do Arco Atlántico.