Rosa Quintana destaca a afinidade cos diversos sectores do mar da UE sobre o futuro do fondo de financiamento pesqueiro

A conselleira do Mar, Rosa Quintana, participou hoxe en Bruxelas no debate cos axentes interesados en materia de pesca da Unión Europea e os membros do Parlamento Europeo sobre a presentación do documento de traballo do ditame FEMP post 2020: investindo nas comunidades costeiras europeas. Alí destacou a afinidade cos representantes dos distintos sectores do mar participantes en relación aos aspectos clave que defende Galicia sobre o futuro do fondo de financiamento pesqueiro.

A conselleira describiu a xuntanza como “moi satisfactoria e gratificante” e destacou a coincidencia das aportacións do sector en obxectivos clave que defende Galicia para o ditame sobre esta ferramenta de financiamento. Entre eles, explicou, a necesidade da continuidade do fondo vinculado ao sector pesqueiro e á súa cadea de transformación e tamén ao sector da acuicultura.

Outro aspecto das aportacións realizadas, que vai en liña co que defende Galicia e que destacou a conselleira, é a necesidade da simplificación administrativa. Neste sentido, Rosa Quintana explicou que se está traballando conxuntamente para propoñer fórmulas, exemplos e argumentos que axuden a esa simplificación no futuro regulamento. Unhas fórmulas, especificou, que á súa vez permitan facer un control para a boa xestión dos fondos.

En relación ás prioridades de cara a esta futura ferramenta, a conselleira indicou que tanto Galicia como os representantes dos sectores do mar en Europa coinciden na necesidade do relevo xeneracional, baseando o apoio dos fondos a aspectos como a mellora da calidade de vida a bordo dos buques pesqueiros.

Rosa Quintana sinalou que Galicia terá en conta estas aportacións no ditame que se está a elaborar, un labor que lidera Galicia por encargo da comisión de Recursos Naturais (NAT) do Comité Europeo das Rexións (CdR). Con estas aportacións, engadiu Rosa Quintana, “espero que entre todos sexamos capaces de mellorar a execución dos fondos estruturais”.

Na xuntanza de hoxe a conselleira estivo acompañada polo director xeral de Relacións Exteriores e coa Unión Europea, Jesús Gamallo, e pola directora xeral de Pesca, Acuicultura e Innovación Tecnolóxica, Mercedes Rodríguez.