O director xeral de Xustiza comproba o funcionamento do xulgado de cláusulas chan de Vigo, que xa tramitou 1.442 demandas

O director xeral de Xustiza, Juan José Martín, visitou hoxe o xulgado de cláusulas chan de Vigo, que desde a súa posta en funcionamento, o 1 de xuño, leva tramitadas 1.442 demandas e ditadas 17 sentenzas. Acompañado polo delegado territorial de Vigo, Ignacio López Chaves; do decano dos xuíces de Vigo, Germán Serrano, e do secretario provincial coordinador, José Tronchoni, Martín visitou as instalacións e destacou o investimento da Xunta de Galicia para lograr a posta en marcha do xulgado.

Juan José Martín recordou que a Xunta puxo tódolos medios necesarios para o funcionamento do xulgado, ao igual que nas outras provincias galegas, unha vez que se habilitou a sala por parte do Consejo General del Poder Judicial, que é o órgano competente na materia. En concreto, trátase de tres funcionarios e das obras de acondicionamento necesarias para a especialización, todo por un valor de 150.000 euros.

A sala foi dotada pola Xunta de Galicia do sistema de gravación e-Fidelius e dun sistema de videoconferencias que, ao tratarse dun xulgado que atende a toda a provincia de Pontevedra, permite que os demandantes non teñan que desprazarse ata a cidade en caso de ter que prestar declaración.

Sobre a posibilidade dun segundo xulgado na cidade de Vigo, o director xeral de Xustiza incidiu no feito de que ata o de agora, e fronte o ocorrido noutras comunidades autónomas, a Xunta sempre dotou de tódolos medios aos xulgados aprobados polo CGPJ. En caso de que a Comisión de seguemento do Consejo General del Poder Judicial decidise o reforzo deste mesmo órgano, o Goberno autonómico volvería dispoñer o necesario para o seu funcionamento.