Licitada a redacción do proxecto do primeiro centro integral de saúde de Galicia, no barrio da Residencia en Lugo

A Xunta publica hoxe no Diario Oficial de Galicia (DOG) a licitación da contratación do servizo de redacción do proxecto e da dirección de obra de construción dun centro integral de saúde do barrio da residencia de Lugo. Esta nova instalación contará cun centro de saúde mental, un centro de saúde e un Punto de Atención Continuada (PAC) no antigo hospital materno infantil.

Esta contratación terá un orzamento de 140.353,68€ (co IVE engadido) e contará cun prazo de execución de catro meses. O acceso ao prego de cláusulas administrativas particulares (PCAP) e ao prego de prescricións técnicas desta contratación poderán consultarse no perfil do contratante, na páxina do Servizo Galego de Saúde http://www.sergas.es/ , así como a documentación necesaria para presentar as proposicións en os criterios de valoración.

O prazo para presentar proposicións é de 15 días naturais a partir do seguinte ao da publicación desta contratación no Diario Oficial de Galicia. Cando o último día para a presentación de ofertas coincida en sábado ou en día inhábil o prazo prorrogarase ata o primeiro día hábil seguinte.

O futuro centro do barrio da Residencia en Lugo será o primeiro centro integral de saúde de Galicia e contará cun investimento de máis de sete millóns de euros e cunha superficie de más de 5.600 metros cadrados de actividade sanitaria, convertíndose no maior centro non hospitalario feito no Servizo Galego de Saúde nos últimos anos.