A Deputación de Ourense garda cinco minutos de silencio polos atentados de Barcelona e Cambrils

A Deputación de Ourense únese á convocatoria da Federación Española de Municipios e Provincias (FEMP) e garda cinco minutos de silencio na entrada principal do Pazo Provincial, con motivo dos atentados perpetrados onte en Barcelona e Cambrils, como mostra de repulsa ante estes feitos e para transmitir a nosa solidariedade ás vítimas e ás súas familias, así como aos barceloneses e veciños de Cambrils.

A deputada provincial, Montserrat Lama, agradeceu, como portavoz do goberno provincial, a presenza de tódolos que se sumaron a esta concentración no Pazo Provincial polos atentados acontecidos onte na cidade condal. “Desde a Deputación de Ourense queremos manifestar a nosa máxima repulsa contra o terrorismo e expresar as nosas condolencias con tódolos familiares e amigos das vítimas. Queremos mandarlle toda a nosa forza ás vítimas e a tódolos veciños de Barcelona e Cambrils”, dixo Montserrat Lama, quen animou a “manternos unidos e traballar xuntos, todo o Estado Español, para combater este tipo de actos”.

As bandeiras da Deputación de Ourense estarán a media asta, durante tres días, en sinal de loito.