López Abella destaca a importancia da sensibilización e da formación nunha xornada sobre mediación e igualdade de xénero
A secretaria xeral da Igualdade, Susana López Abella, participou esta mañá na inauguración da Xornada “Igualdade de Xénero e mediación: unha oportunidade para explorar?”, organizada pola Universidade de Santiago de Compostela (USC).
Ao acto tamén asistiron o decano da Facultade de Dereito, Gumersindo Guinarte, e a directora das xornadas, Raquel Castillejo Manzanares, catedrática de dereito procesual da USC.
Durante a súa intervención, a secretaria xeral apelou á necesidade de sumar esforzos entre todos os membros da sociedade para construír unha sociedade en igualdade. Para conseguilo, considerou prioritario seguir afondando na sensibilización, na formación e na aplicación de determinadas accións positivas que axuden a superar as barreiras de xénero.
Neste aspecto, puxo en valor iniciativas como a mediación, un proceso que busca resolver os conflitos cunha solución positiva e válida para ambas partes, baixo os principios da vontade, o diálogo e o consenso. Grazas a todos estes valores, considerou que a mediación pode ser unha ferramenta fundamental para converter a igualdade de oportunidades nunha realidade.